હણો ના પાપીને, દ્વિગુણ બનશે પાપ જગનાં,
લડો પાપો સામે વિમળ દિલના ગુપ્ત બળથી.
સુંદરમ્

અનુભૂતિ-જગદીશ જોષી

પાંદડી તે પી પી ને કેટલું રે પીશે
કે મૂળિયાંને પાડવાનો શોષ ?
આભ જેવા આભને હૈયામાં હોય કદી
જળના વરસ્યાનો અફસોસ ?

એક પછી એક મોજાં આવે ને જાય
એને કાંઠે બેસીને કોણ ગણતું ?
વાદળના કાફલાનું ગીત અહીં લ્હેરખીમાં
રેશમનો સૂર રહે વણતું;
ઉઘાડી આંખે આ જાગતા ઉજાગરાને
આઘાં પરોઢ આઠ કોશ !

નીંદરતી આંખમહીં ઊમટીને ઊભરાતું
જાગે છે સપનાંનું ટોળું,
કિરણોની એક એક કાંકરીઓ નાખીને
જંપ્યું તળાવ તહીં ડહોળું:
આખા આકાશને ઓઢીને ઠરવાનો
જળને છે ઝીણો સંતોષ !

પાંદડી તે પી પી ને કેટલું રે પીશે
કે મૂળિયાંને પાડવાનો શોષ ?
આભ જેવા આભને હૈયામાં હોય કદી
જળના વરસ્યાનો અફસોસ ?

અત્યંત રમણીય કલ્પનો મઢ્યું રળીયામણું ગીત….એટલા બધા અર્થો છુપાયા પડ્યા છે કે એક અર્થ આપવો ગીતને અન્યાય કરવા બરાબર છે. વારંવાર વાંચીને ગણગણ્યા કરવાથી આપોઆપ ભાવાકાશ ખુલે છે.

7 Comments »

  1. Rina said,

    July 31, 2011 @ 12:48 am

    પાંદડી તે પી પી ને કેટલું રે પીશે
    કે મૂળિયાંને પાડવાનો શોષ ?
    આભ જેવા આભને હૈયામાં હોય કદી
    જળના વરસ્યાનો અફસોસ ?
    great……

  2. shantilal bauva said,

    July 31, 2011 @ 3:59 am

    bahuja sarasa

  3. DHRUTI MODI said,

    July 31, 2011 @ 4:35 pm

    ગીત ગણગણવાની સાચે જ મઝા પડી.

  4. Dhaval said,

    July 31, 2011 @ 6:57 pm

    સંતોષનું અદભૂત ગાન !

  5. વિવેક said,

    August 1, 2011 @ 1:55 am

    ઉત્તમ ગીતરચના…

  6. mita parekh said,

    August 2, 2011 @ 1:37 am

    just superb.u can feel only nature around.

  7. Maheshchandra Naik said,

    August 2, 2011 @ 2:50 pm

    સરસ ગીત,
    ઈશ્વરની અનુભૂતિનો અહેસાસ કરાવતુ ગીત………
    આપનો આભાર…………………કવિશ્રીને અભિનદન્…………..

RSS feed for comments on this post · TrackBack URI

Leave a Comment