(સોહમ્-સોહમ્) – અકબરઅલી જસદણવાલા
દિલમાં ખૂશ્બુ, આંખમાં શબનમ,
જીવન મારું ફૂલની મોસમ.
તું શું જાણે પ્યાસ અમારી,
શાના તોબા, શાનો સંયમ?
દ્રષ્ટિ એવું શું દેખી ગઈ,
ઝાંખું ઝાંખું લાગે આલમ.
આવ તને હું સમજાવી દઉં,
ગંગાજળ છે આબે ઝમઝમ.
મારી ખામોશી દીવા જેવી,
એની વાતો મોઘમ મોઘમ.
બોલું તો અલ્લાહો ‘અકબર’
મૌન ધરું તો ‘સોહમ્-સોહમ્’.
– અકબરઅલી જસદણવાલા
પરંપરાના શાયરની એક મજાની ગઝલ… ટૂંકી બહર, અને અર્થગંભીર વાત. મક્તામાં કવિએ પોતાનું નામ પણ અર્થસભરરીતે બખૂબી વણી લીધું છે.
વિરલ વ્યાસ said,
July 1, 2026 @ 12:37 PM
મૌન ધરું તો ઓ…………..વાહ