બીજું હું કાંઈ ન માગું – બાદરાયણ
આપને તારા અન્તરનો એક તાર
બીજું હું કાંઈ ન માગું
સુણજે આટલો આર્ત તણો પોકાર
બીજું હું કાંઈ ન માગું .
તૂંબડું મારું પડ્યું નકામું
કોઇ જુએ નહીં એના સામું;
બાંધીશ તારા અંતરનો ત્યાં તાર
પછી મારી ધૂન જગાવું.
સુણજે આટલો આર્ત તણો પોકાર
બીજું હું કાંઈ ન માગું .
એકતારો મારો ગુંજશે મીઠું
દેખાશે વિશ્વ રહ્યું જે અદીઠું;
ગીતની રેલશે એક અખંડિત ધાર,
એમાં થઈ મસ્ત હું રાચું.
આપને તારા અન્તરનો એક તાર
બીજું હું કાંઈ ન માગું
– ભાનુશંકર બા. વ્યાસ ‘બાદરાયણ’
અંતરના આર્તસ્વરે કવિ નક્કામા પડી રહેલા તૂંબડા માટે ઈશ્વરના અંતરનો વધુ નહીં, માત્ર એક તાર માંગે છે કેમકે કવિ જાણે છે કે એક તાર જ તૂંબડાને એકતારો બનાવી શકે છે અને એના રણઝણાટથી સૌના આકર્ષણનું પાત્ર થઈ શકાય છે કે આત્મચેતનાવિકાસની પાત્રતા મેળવી શકાય છે…જેવું તૂંબડાનું એવું જ મનખાવતારનુ !!
P Shah said,
July 17, 2009 @ 4:42 AM
પ્રભુ તારા સિન્ધુમાંથી મને એક જ બિન્દુ આપ,
જેથી ભીની રહે આ રસના !
pragnaju said,
July 17, 2009 @ 11:05 AM
સૌને ગમતી ભાવવાહી પ્રાર્થના
એકતારો મારો ગુંજશે મીઠું
દેખાશે વિશ્વ રહ્યું જે અદીઠું;
ગીતની રેલશે એક અખંડિત ધાર,
એમાં થઈ મસ્ત હું રાચું.
આપને તારા અન્તરનો એક તાર
બીજું હું કાંઈ ન માગું
અનુભૂતિ કરાવે તેવી પંક્તીઓ
તારો આપ અષાઢીલો કંઠ: ખોવાયેલી
વાદળીને હું છેલ્લી વાર સાદ પાડી લઉં.
ઈંદ્રધનુ ! … તારા લાખ તારોમાંથી ખેંચવા દે
એક તાર: બેસાડીને સૂર બાકીના પાછી સોંપી દૈશ
હું વીણા. ઘોર સિંધુ !
mrunalini said,
July 17, 2009 @ 11:15 AM
તૂંબડું મારું પડ્યું નકામું
કોઇ જુએ નહીં એના સામું;
બાંધીશ તારા અંતરનો ત્યાં તાર
પછી મારી ધૂન જગાવું.
સુણજે આટલો આર્ત તણો પોકાર
બીજું હું કાંઈ ન માગું
હ્રુદયસ્પર્શી વાત્
યાદ આવ્યું
માગું હું તારા અંતરનો એક તાર ,
બીજું હું કાંઇ ન માગું રે !
વિશ્વવિધાતા ! નૈન ઘેરાયાં , ઘેરાયાં ઘોર અંધાર ;
આતમ-દીપક જાય બુઝાતો , બંધ થયાં ઉરદ્વાર ;
માગું તારા ચક્ષુ તણા ચમકાર ,
બીજું હું કાંઈ ન માગું રે !
જીવનસાગર જાય હિલોળે , વાયુ ચઢ્યો વંટોળ ,
નૈયા મારી ડગમગ ડોલે , એકલડો હું અબોલ ;
માગું મારા સુકાનીનો સહકાર ,
બીજું હું કાંઈ ન માગું રે !
અંતર આંધી ઘોર ઘેરાએ , ના કોઈ સાથ-સંગાથ ,
એકલડો હું મારગ ધાતો , પંથ અતિ વિકરાળ ,
માગું મારો હાથ ગ્રહો પળવાર ,
બીજું હું કાંઈ ન માગું રે !
મંદિર મારું મૂર્તિ વિહોણું , સર્વ દીસે સૂનકાર ,
જીવનબીનના સૂર લોપાતાં શાંત થશે ઝંકાર ;
યાચું : આવો અંતરના આધાર !
બીજું હું કાંઈ ન માગું રે !
priyjan said,
July 17, 2009 @ 11:42 AM
simple and beautiful…………very very touching.
ઊર્મિ said,
July 17, 2009 @ 1:47 PM
આપને તારા અન્તરનો એક તાર
બીજું હું કાંઈ ન માગું
સુણજે આટલો આર્ત તણો પોકાર
બીજું હું કાંઈ ન માગું
મારી ઓલટાઈમ ફેવરીટ પંક્તિઓ….!
sudhir patel said,
July 17, 2009 @ 9:06 PM
અન્તરથી થયેલી અંતરને સ્પર્શતી પ્રાર્થના!
સુધીર પટેલ.
Kirtikant Purohit said,
July 18, 2009 @ 6:33 AM
નાનપણનું વાંચેલ આ કાવ્ય ફરી વાંચ્વાની મઝા આવી. કવિશ્રી બાદરાયણ સી.પી.ટેંક મુંબઇમાં અમારી નજીક રહેતા. તેમની પડછંદ પ્રતિભા યાદ આવે છે. તેમના સંચાલનમાં મુશાયરો સાંભળ્યાનું પણ યાદ છે. કેટ્લી સરસ ભાવ્વાહી રચના.