તિથિસાર ! – વીરુ પુરોહિત
પડવે તું પોતે આવી ને બીજે મોકલી આંખો જી !
ત્રીજે મારે બીલીપત્ર પર ચહેરો ચીતરી નાખ્યો જી !
ચોથે ચમકી વીજળી, પાંચમ ‘પિયુ પિયુ’ પોકાર જી ,
છઠ્ઠે મારું ભીતર તું ભીંજવતી અનરાધાર જી !
મેઘધનુષ્યની પણછ તૂટીને સાતમ રંગફુહાર જી,
આઠમ કળી કમળની, તારા શરીરનો શણગાર જી !
નવમીનો ક્ષય, તડકો નીકળ્યો, અમને ફૂટી પાંખો જી;
પડવે તું પોતે આવી ને બીજે મોકલી આંખો જી !
તોરણ બાંધી દશે દ્વાર પર અમને લખિયો કાગળ જી !
“અગિયારસના શુભ અવસર પર તમે વધેરો શ્રીફળ જી !”
બારસ ખુલ્લા બાજુબંધ ને તેરસ ભીડી ભોગળ જી !
ચૌદ ભુવનની તું મહારાણી, ચરણ ચાંપતાં વાદળ જી !
પૂનમનો તેં ભરી વાડકો, મને કહ્યું કે ‘ચાખો જી !’
પડવે તું પોતે આવી ને બીજે મોકલી આંખો જી !
– વીરુ પુરોહિત
તમામ ગુજરાતી તિથિઓને કળાત્મકરીતે સાંકળી લેતું આવું સરસ મસ્તીસભર પ્રણયગીત આ પૂર્વે કદી વાંચ્યાનું સ્મરણ છે ?
ડૉ.મહેશ રાવલ said,
June 12, 2010 @ 2:11 AM
પડવેથી પૂનમના તિથિમેળે પાંગરતી, સુંદર તો ખરી જ પણ માદક પ્રેમેભરી લાગણીથી ઊભરાતી લાવણ્યસભર અભિવ્યક્તિનું ગીત કહીશ હું તો……આજે જે તિથિ હોય એ, પણ આ ગીતે પૂનમ-પૂનમ કરી મુક્યું આખુંય તારિખિયું….!
સુનીલ શાહ said,
June 12, 2010 @ 2:12 AM
ભઈ..વાહ..! સુંદર ગીત.
વિહંગ વ્યાસ said,
June 12, 2010 @ 5:33 AM
સુંદર મજાનું નાવિન્યભર્યું ગીત.
pragnaju said,
June 12, 2010 @ 6:34 AM
તોફાની પ્રણય ગીત
બારસ ખુલ્લા બાજુબંધ ને તેરસ ભીડી ભોગળ જી !
ચૌદ ભુવનની તું મહારાણી, ચરણ ચાંપતાં વાદળ જી !
વાહ
ગજબના નશીલા રાતના પ્રહરમાં ગવાતો આ રાગ.
માલકૌંસના સ્વરો મનમા ઝંકૃત થઈ ઊઠ્યા..
પૂનમનો તેં ભરી વાડકો, મને કહ્યું કે ‘ચાખો જી !’
પડવે તું પોતે આવી ને બીજે મોકલી આંખો જી !
—————————–
આવું સરસ મસ્તીસભર પ્રણયગીત
આ પૂર્વે કદી વાંચ્યાનું સ્મરણ છે ?
હા,તેમની આ પંક્તી વાત વાતમા કહું છું!
મારી એકાદી આંગળીને કાપી કરું કલમ,
કાગળ જેવું તો કંઈક આપો.
sudhir patel said,
June 12, 2010 @ 12:50 PM
દરેક તિથિની ખાસિયતને કાવ્યમય અને લયબધ્ધ વ્યક્ત કરતું ગીત અહીં વાંચી માણવાની મજા આવી!
સુધીર પટેલ.
"માનવ" said,
June 13, 2010 @ 12:10 AM
વાહ શું ગીત છે!
Pancham Shukla said,
June 14, 2010 @ 7:01 AM
ગુજરાતી તિથિઓને મધુર અને નાવિન્યપૂર્ણ રીતે સાંકળી છે.