એક મિથિકલ ગઝલ – મનસુખ વાઘેલા
હજીય ઈવ ને આદમના હોઠ ભૂખ્યા છે,
ને સર્પ વાત કરે છે હજીય ફળ વિશે !
થયા છે ખત્મ હવે નાભિ કેરા કિસ્સાઓ,
બધા જ વાત કરે છે હવે કમળ વિશે !
ચરણમાં તીર લઈ શ્યામ ઘૂમતા આજે,
કદાચ ગોપીઓ કહે આ લીલા-છળ વિશે !
ફરીથી પૃથ્વી આ ફાટે તો જાનકી નીકળે ?
છતાં છે રામને ચિંતા હવે અકળ વિશે !
બચાવી શામાંથી લીધી મનુએ હોડી આ ?
હલેસાં પૂછતાં થયાં છે હવે જળ વિશે !
હવેથી દંતકથાઓનું નામ ‘મનસુખ’ છે,
હરેક સ્થળ મને ચર્ચે હરેક પળ વિશે !
– મનસુખ વાઘેલા
‘પ્રિયજન સાથેની ગુફ્તેગૂ ‘થી શરૂ થઈ ગઝલની યાત્રા કોઈપણ પ્રકારની કવિતાના સાહજિક ગુણધર્મને અનુસરતી સમષ્ટિ સાથે એકરસ થઈ ગઈ… આજે માણીએ એક મિથિકલ ગઝલ… બધા જ પાત્રો અને વાત સ્વયંસ્પષ્ટ છે… જો કે એક વાત જે આ મત્લા વિનાની ગઝલમાં મને સમજાઈ નહીં તે ઈવ અને આદમની વાત… બધાજ પુરાકલ્પન હિંદુ પુરાણમાંથી લીધા છે તો આ એક ખ્રિસ્તી ધર્મમાંથી કેમ ?
નેહા said,
October 17, 2013 @ 2:57 AM
બચાવી શામાંથી લીધી મનુએ હોડી આ ?હલેસાં પૂછતાં થયાં છે હવે જળ વિશે !
ક્યા બાત!
અભિનંદન કવિ
આભાર લયસ્તરો…
narendarsinh said,
October 17, 2013 @ 4:25 AM
અત્યન્ત સુન્દર રચના
perpoto said,
October 17, 2013 @ 9:39 AM
૨૦૧૪ મા આ ગઝલનો ખોટો ઉપયોગ ના થાય….
થયા છે ખત્મ હવે પપ્પુ કેરા કિસ્સાઓ,
બધા જ વાત કરે છે હવે કમળ વિષે!
P. P. M A N K A D said,
October 18, 2013 @ 4:53 AM
Not only the main ghazal, but also the striking lines by Shri Perpoto are very convincingly good.
Laxmikant Thakkar said,
October 22, 2013 @ 8:43 AM
આસ્વાદક :-“બધાજ પુરાકલ્પન હિંદુ પુરાણમાંથી લીધા છે તો આ એક ખ્રિસ્તી ધર્મમાંથી કેમ ?” – આવો પ્રશ્ન કેમ ?
“નાભિ ” ,” કમળ “= માણસ જાત ની વાત નહીં ? ‘ રિવર્સ-રિકોલ ?’
” જો કે એક વાત જે આ મત્લા વિનાની ગઝલમાં મને સમજાઈ નહીં તે ઈવ અને આદમની વાત… બધાજ પુરાકલ્પન હિંદુ પુરાણમાંથી લીધા છે તો આ એક ખ્રિસ્તી ધર્મમાંથી કેમ ?”
ધર્મ-ભેદ ક્યાંથી આવ્યો ?
-લા’ કાંત / ૨૨-૧૦-૧૩
વિવેક said,
October 24, 2013 @ 2:05 AM
@ લક્ષ્મીકાન્ત ઠક્કર:
થયા છે ખત્મ હવે નાભિ કેરા કિસ્સાઓ,
બધા જ વાત કરે છે હવે કમળ વિશે !
– નાભિ અને કમળની વાત સાંભળતા જ બ્રહ્માનું સ્મરણ થાય… શેષશાયી વિષ્ણુની નાભિમાંથી નીકળેલું કમળ એ બ્રહ્માનું આસન છે…
ધર્મભેદ વિશે વાત કરું તો હું પોતે કોઈપણ ધર્મમાં માનતો નથી.. આજે દુનિયામાં એકપણ ધર્મ એવો નથી જે જડમૂળથી સડી ગયેલો ન હોય. હું તો માત્ર ગઝલના સંદર્ભે જ વાત કરું છું… કવિએ છ શેરની ગઝલમાં મક્તાના શેરને બાદ કરતાં ચાર શેરમાં હિંદુ પુરાણકથાઓનો સહારો લીધો છે એ જોતાં મત્લાનો શેર ચોક્કસ જ આગંતુક લાગે છે… આ ફક્ત કવિતાની દૃષ્ટિ છે…
Laxmikant Thakkar said,
October 28, 2013 @ 11:28 PM
આભાર વેવેકભાઇ ….ખુલાસા બદ્દલ …..આ તો સહજ સવાલ ઉપજ્યો ….એટલેજ !
-લા’ / ૨૯-૧૦-૧૩
ravindra Sankalia said,
October 29, 2013 @ 7:43 AM
મિથિકલ ગઝલ માણવાની મઝા આવી.