જાગીને જોઉં તો – નરસિંહ મહેતા
જાગીને જોઉં તો જગત દીસે નહિ,
ઊંઘમાં અટપટા ભોગ ભાસે;
ચિત્ત ચૈતન્ય વિલાસ તદ્રુપ છે,
બ્રહ્મ લટકાં કરે બ્રહ્મ પાસે … જાગીને
પંચ મહાભૂત પરબ્રહ્મ વિશે ઉપજ્યાં,
અણુ અણુમાંહીં રહ્યાં રે વળગી;
ફૂલ ને ફળ તે તો વૃક્ષનાં જાણવાં,
થડ થકી ડાળ નવ હોય અળગી … જાગીને
વેદ તો એમ વદે, શ્રુતિ-સ્મૃતિ શાખ દે
કનક કુંડલ વિશે ભેદ ન્હોયે;
ઘાટ ઘડિયાં પછી નામરૂપ જૂજવાં
અંતે તો હેમનું હેમ હોયે … જાગીને
જીવ ને શિવ તો આપ ઇચ્છાએ થયા
રચી પ્રપંચ ચૌદ લોક કીધા;
ભણે નરસૈંયો એ ‘તે જ તું’, ‘તે જ તું’
એને સમર્યાંથી કૈં સંત સીધ્યા … જાગીને
– નરસિંહ મહેતા
વ્યાસોચ્છિષ્ઠમ જગત સર્વં – ની જેમ નરસિંહ મહેતા ગુજરાતીમાં જાણે કે બધું જ કહી ગયા છે….. કશું બાકી નથી હવે……
Suresh Shah said,
June 17, 2013 @ 3:41 AM
ભક્તકવિ નરસિંહ મહેતા ને લયસ્તરો નું માધ્યમ મળ્યું હોત તો?
કવિએ આદિકાળમાં જીવનના સત્યો કેવી સુંદર રીતે રજૂ કર્યાં છે!
વ્યાસોચ્છિષ્ઠમ જગત સર્વં – ની જેમ નરસિંહ મહેતા ગુજરાતીમાં જાણે કે બધું જ કહી ગયા છે….. કશું બાકી નથી હવે……
ખૂબ જ સાચુ કહ્યું તમે.
– સુરેશ શાહ, સિંગાપોર
Harshad said,
June 17, 2013 @ 9:04 PM
Bhakt Shri Narsinh Mehata is the gaurav of Gujarati bhasha. I do not think another Narsinh Mehata will born again. Millions of salute for this rachana will not be enough.
M.D.Gandhi, U.S.A. said,
June 18, 2013 @ 1:07 AM
નરસિંહ મહેતાના ભજનો અલૌકિક છે. એમના બધા ભજન બહુ સરળ ભાષામાં હોય છે એટલે મોઢે ઝટ થઈ જાય છે. જોકે આ ભજનમાં થોડા શબ્દો અઘરા છે, પણ “ઘાટ ઘડિયાં પછી નામરૂપ જૂજવાં
અંતે તો હેમનું હેમ હોયે …” આ શબ્દો તો અતિ પ્રખ્યાત થઈ ગયા છે. સુંદર ભજન છે.
Pravin Shah said,
June 18, 2013 @ 10:00 AM
સાત સાત જન્મો સુધરી જાય જો આ એક જ ગીત સમજાય.
જય હો જુનાગઢ નર !
pragnaju said,
June 18, 2013 @ 10:09 AM
આનંદ આનંદ
હવે તો…
નરસિંહ મહેતા એવોર્ડ એ પ્રતિવર્ષ એનાયત કરવામાં આવતો ગુજરાતી સાહિત્ય ક્ષેત્રનો સૌથી મોટો પુરસ્કાર છે
Ramesh Patel said,
June 18, 2013 @ 12:19 PM
બ્રહ્મ લટકાં કરે બ્રહ્મ પાસે … જાગીને
સંતકવિના આત્મ સાક્ષ્તાકાર સાથે દિવ્ય અનુભૂતિ પછીની , માનવ જીવનને એ પરમ ચૈતન્યના સમીપે લઈ જતી , આ રચના પંડિતાઈની ચરમ સીમા છે.
રમેશ પટેલ(આકાશદીપ)