આવકાર સપ્તાહ: ૦૫: ‘ઝરતી ક્ષણો’ – કૌશલ યાજ્ઞિક
આવકાર-સપ્તાહના ઉપક્રમે આજે પાંચમા સંગ્રહ ‘ઝરતી ક્ષણો’ને હૃદયપૂર્વક પોંખીએ. ગીત-ગઝલની ભરમારની વચ્ચે કવિ કૌશલ યાજ્ઞિક હાઈકુસંગ્રહ લઈને આવ્યા છે એનો આનંદ. કવિના ભાવવિશ્વ પરથી સ્નેહરશ્મિના સમયકાળનો પ્રભાવ કદાચ પૂરેપૂરો ઓસર્યો નથી. મોટાભાગનાં હાઈકુ સૂર્ય, ચંદ્ર, વન, નદી, વૃક્ષ, પથિક વગેરેની આસપાસ જ ફરતા હોવાથી સમસામયિકતાનો સંસ્પર્શ પ્રમાણમાં ઓછો વર્તાય છે. જો કે એ કવિની પોતાની પસંદગી પણ હોઈ શકે. સંગ્રહમાં ઘણાં હાઈકુ મજાનાં છે. એમાંથી કેટલાક હાઈકુ આસ્વાદીએ…
સૂરજ ઊગે:
પોઢી નદીનાં નીર
હલેસે જાગે.
લીલ જામેલા
સરે પડે હલેસાં-
સૂર્યદર્શન.
ગ્રીષ્મ બપોર:
પડછાયો સંતાય,
સૂરજ શોધે.
નયન ભીનાં:
સૂરજ પેખું, અહો
ઇન્દ્રધનુષ.
દીપક બૂઝ્યો:
અંધારું વહેરતું
તેજ લપાયું.
સફર ખેડે
વાદળ નભે: ચંદ્ર
છૂપાતો ફરે.
પૂર્ણિમા:ચંદ્ર
તરતો સર મહીં,
સ્થિર ત્યાં હંસ.
પડી તડકે
કુહાડી, કઠિયારો
વિરમે છાંયે
– કૌશલ યાજ્ઞિક
Harshad Parekh said,
May 8, 2026 @ 10:35 AM
હું પણ WAITING માં છું,૨૦૨૬ના વર્ષમાં મારો હાઇકુ સંગ્રહ પ્રકાશિત થઈ શકે તે પહેલાં મળવા માગું છું 9376211332
Barin Dixit said,
May 8, 2026 @ 11:27 AM
અમારા અમદાવાદની બુધસભાના સહપાઠી છે. ખૂબ સરસ હાઈકુ લખે છે. એમાં પાછું આપનું સેલેક્શન એટલે જોવાનું શું ? એથી વધારે અમારા જેવા નવોદિતોને પ્રોત્સાહન પણ સરસ આપે છે. કૌશલભાઈને અભિનંદન અને શુભકામનાઓ 🙏🙏🌺🌺
DILIP DHOLAKIYA SHYAM said,
May 8, 2026 @ 11:48 AM
હાઈકુ સંગ્રહને આવકાર…
કવિ શ્રીને ખૂબ ખૂબ શુભેચ્છાઓ 🌹🌹
Harihar Shukla said,
May 8, 2026 @ 12:17 PM
નયન ભીનાં વાળા હાઈકુને છોડીને બાકીનાં બધાં મનભાવન👌
કવિને અભિનંદન પ્રથમ હાઈકુ સંગ્રહ માટે.