પ્રકાશના પગથારે – ડૉ. બટુકરાય પંડ્યા
આ પ્રકાશના પગથારે !
કો’ અંગુલિના અણસારે!
કોણ રહ્યું આકર્ષી મુજને અભિનવ આંખ ઇશારે? — આ.
સૂનાં અંતર, સૂનાં આંગણ,
નીંદર ઘેન ઢળી’તી પાંપણ;
કોણ ગયું ખખડાવી સાંકળ બંધ હૃદયના દ્વારે? — આ.
શ્યામ તિમિર પથ આગળપાછળ,
ગરજે ઘોર નિરાશા વાદળ;
કોણ અગોચર માર્ગ ઉજાળે વીજ તણા ચમકારે? — આ.
નાદબ્રહ્મ શાશ્વત હે સુંદર!
અચળ સત્ય હૈ ષડ્જ શિવંકર!
છેડો ભૈરવ રાગ વાદ્ય આ રોમેરોમ પુકારે! — આ.
– ડૉ. બટુકરાય પંડ્યા
દિવ્ય પ્રકાશની અનુભૂતિથી જાગેલી ચેતનાનું આ ગાન છે. એક અણસારો માત્ર પ્રાપ્ત થઈ જાય પછીના આકર્ષણને કોણ રોકી શકે? અંતર અને આંગણ – બધું જ સૂનું હતું અને માંહ્યલો ઊંઘતો હતો એવામાં કોઈક ગેબી વટેમાર્ગુ આવીને હૃદયના દ્વાર ખખડાવી ગયું હોવાનો અહેસાસ થયો. જીવનનો માર્ગ આગળપાછળ બધેથી અંધારાથી ભર્યો હતો અને આકાશમાંય નિરાશાના વાદળો જ ગર્જ્યાં કરતાં હતાં. આવામાં કોઈક અગોચરે વીજળીના ઝબકારે પ્રકાશનો પગથાર દેખાડી દીધો, આંખના ઈશારે આમંત્રણ દીધું. આંગળીનો અણસારો દેનાર આ બીજું તો કોણ હોય? સત્યમ્ શિવમ્ સુંદરમ્ જ ને! જીવનમાં પ્રભાત થાય, જ્ઞાનનો સૂર્યોદય થાય ત્યારે દેહના વાદ્યમાં રોમરોમેથી શિવારાધના કરતો ભેરવ રાગ જ ઊઠે ને !
Vinod Manek, Chatak said,
August 18, 2023 @ 12:58 PM
વાહ સરસ ગીતિકા જાણે અંતરની અનુભૂતિનો નાદ
Harsha Dave said,
August 18, 2023 @ 1:02 PM
વાહ…. પાણીદાર મોતી જેવા જેવું સર્જન
અભિનંદન લયસ્તરો
Parbatkumar Nayi said,
August 18, 2023 @ 1:40 PM
વાહ વાહ વાહ
ખૂબ સરસ લયસ્તરો
BHUMA VASHI said,
August 18, 2023 @ 10:28 PM
Beautiful…
Kamlesh Shukla said,
August 19, 2023 @ 8:41 AM
ખૂબ જ સરસ ગીત.
અડધી રાતે અડધી રાતે
કોણ આવી મારે બારણે બોલ્યું,
ચાલને પથીક મારી સાથે મારી સાથે
Tanu patel said,
August 20, 2023 @ 10:29 PM
કો’ અંગુલિના અણસારે… ઈશ્વર પથદર્શક….
સરસ ગીત….
Poonam said,
September 1, 2023 @ 11:01 AM
આ પ્રકાશના પગથારે !
કો’ અંગુલિના અણસારે!
કોણ રહ્યું આકર્ષી મુજને અભિનવ આંખ ઇશારે? — આ.
– ડૉ. બટુકરાય પંડ્યા – સરસ !
Aaswad Mast !
લતા હિરાણી said,
September 2, 2023 @ 12:14 PM
કવિ નિરંજન ભગત યાદ આવે