(સરવડાં) નભને નેપથ્ય કોણ – ઉમાશંકર જોશી
નભને નેપથ્ય કોણ બેસીને આજ,
ધીરી ધીરી મેઘની બજવે પખવાજ?
પડદો અંધારનો ઢળ્યો છે ધરા પરે.
તારા ડોકાય માંડ બેક આભછાપરે;
. જોઈ રહ્યા: કોણ આજ સજે રંગસાજ. નભને…
ત્યાં તો થાપી પરે પડે હાથ જોરમાં,
ધસી વીજ-નર્તકી કરે નાચ તોરમાં.
. વિશ્વરંગભૂમિ પરે એક એનું રાજ. નભને…
– ઉમાશંકર જોશી
મોબાઇલમાં મેસેજ કે નોટિફિકેશન સ્કીપ કરી શકાય એ રીતે ઋતુઓને સ્કીપ કરી શકાતી હોય તો ઉનાળો મોટાભાગના લોકો સ્કીપ કરવા માંગે. જે રીતે દિવસ આખામાં સાંજ એ રીતે તમામ ઋતુઓમાં ચોમાસુ જ માનવમનને વધુ આકર્ષે છે. વિશ્વના રંગમંચ પર એનું એકહથ્થું શાસન છે. વરસાદ પડવાની તૈયારી થાય એટલે આભ ગોરંભે ચડે. ઘનઘોર વાદળાં પૃથ્વીને જાણે અંધારાનો પડદો ઢાળીને ઢાંકી દે છે. પરદા પાછળ સંતાઈને કો’ક ધીરી ધીરી પખવાજ વગાડી રહ્યું છે. આકાશમાં માંડ દેખાતા બે’ક તારા આંખો ટમટમાવીને આ કોણ સજીધજી રહ્યું છે એ જોઈ રહ્યા છે. એવામાં વીજળીનું નૃત્ય આરંભાય છે ને કડાકાભેર મેઘગર્જના સાથે વરસાદ શરૂ થાય છે.
Mita GM said,
July 24, 2026 @ 1:03 PM
Waaah
tanu patel said,
July 25, 2026 @ 7:17 PM
વાહ,વીજ નર્તકી…