શબ્દસુમન : ચંદ્રકાન્ત શેઠ – ૦૩ – તું ચલવે ને…
તું ચલવે ને હું અહીં ચાલું, દાવ અજબ એ ખેલી જા;
જે કંઈ તારે પાલવ ગાંઠ્યું, બધું દાવમાં મેલી જા.
હાર-જીતના હિસાબ તે શા? રમાય એની રહે મજા;
રમતાં રમતાં ગૂંચ પડે તો, તક છે, તુરત ઉકેલી જા.
કેટકેટલા ચાંદ-સિતારા એક જ તારા ચ્હેરામાં!
એ સૌ આડે પડદા શેના? સત્વર સૌ સંકેલી જા.
સોનેરી સપનાંને ઝુમ્મર નીંદર મારી ઝળાંઝળાં;
રાતરાણીની સરહદ પરથી સુગંધ અહીંયાં રેલી જા.
જ્યારે તારો ઉઘાડ નીકળે, તારો પાયલ-પંથ ખૂલે;
બંધ બારણું મારી અંદર, તે હળવેથી ઠેલી જા.
– ચંદ્રકાન્ત શેઠ
સામાન્યરીતે છંદોબદ્ધ કવિતા, અછાંદસ અને ગીતોથી જાણીતા કવિ ગઝલોના ચલણથી પરે રહી શક્યા નથી. ગઝલ જેમના રક્તસંસ્કાર ન હોય એવા કવિ જ્યારે ગઝલમાં ખેડાણ કરે ત્યારે ગીત-સૉનેટની બાની ગઝલમાં આવી જવાની વકી પૂરેપૂરી, પણ સદનસીબે ચંદ્રકાન્ત શેઠની મોટાભાગની ગઝલો આમ થવાથી બચી ગઈ છે. ઊલટું, એમનું કવનસામર્થ્ય ગઝલને ઉપકારક નીવડતું જણાય છે. પ્રસ્તુત રચનાને આ દાવા માટેની દલીલ ગણી શકાય. ખરું ને?
મીતા said,
August 16, 2024 @ 12:38 PM
સરસ મજાની ગઝલ… લયસ્તરોને અભિનંદન
કવિની દિવ્યચેતનાને સાદર વંદન…
Varij Luhar said,
August 16, 2024 @ 3:17 PM
વાહ.. ગઝલને પણ ખૂબ શણગારી છે
Dhruti Modi said,
August 18, 2024 @ 3:28 AM
સુંદર ગઝલ !
સોનેરી સપનાંને ઝુમ્મર નીંદર મારી ઝળહળાં;
રાતરાણીની સરહદ પરથી સુગંધ અહીંયા રેલી જા
કેવી સુંદર કલ્પના ! સાદ્યાંત ગઝલ ગમી ! 👌👌💗💗
Poonam said,
August 26, 2024 @ 5:29 PM
…રમતાં રમતાં ગૂંચ પડે તો, તક છે, તુરત ઉકેલી જા.
– ચંદ્રકાન્ત શેઠ – Saral ne Saras !
Khari sir ji 🙏🏻