ચૂંટેલા શેર – ડૉ. પરેશ સોલંકી
આંસુઓનો ભાર લાગ્યો એટલે લખતો રહું છું,
શબ્દ તારણહાર લાગ્યો એટલે લખતો રહું છું.
મન ઝરૂખે ને જાત પિંજરમાં,
એક યોગી ગહન દ્વિધામાં છે.
કેદ જ્યાં ઈશ્વર થયો છે ચણતરોમાં,
મંદિરોને પણ ધરમનો ક્ષાર લાગે!
એટલે ઈજ્જત બચી ગઈ ખાલીપાની,
સ્મરણોએ આવવાની ના કહી છે.
પ્રેમમાં તારા મને પાગલ થવા દે,
કાં, બધાં વળગણ છૂટે એવી દવા દે.
અહીં યાદમાં આખું ચોમાસું ને ત્યાં-
સરેઆમ વરસાદ પણ બેઅસર છે.
કોઈ આવી વૃક્ષની ઘેઘૂરતા છેદી ગયું,
વીજળીના તાર પર બેઠું છે પંખી ભગ્ન થઈ.
હાથમાં હો હાથ ને મન દૂર હો,
આ અવસ્થા પ્રેમની ગંભીર છે.
સાવ ઓચિંતું સ્મરણ ને જામ હો,
સાંજના વૈભવની એ તાસીર છે.
જિંદગી બેસુમાર ચાહી છે,
આ ફકીરી એની ગવાહી છે.
થાક ઊંચાઈ પર બહુ લાગ્યો,
હા, તળેટી ચરણને ફાવી છે.
ક્યાંક અકબંધ છે કસક મારી,
સ્મિત સાથે ગવાઈને આવી.
લો, શરૂઆત જ્યાં પ્રણયની થઈ,
લાગણીઓ રિસાઈને આવી.
દોસ્ત તારી યાદનો દરબાર રાબેતા મુજબ છે,
આ નગરની ભીડમાં સૂનકાર રાબેતા મુજબ છે.
શ્વાસ આપીને શ્વાસ માંગે છે,
જિંદગી ક્યાં ઉધાર રાખે છે?
વગર નાવે ગઝલ દ્વારા,
બધા સાગર તરી બેઠો.
તેં બીડેલા સ્પર્શવાળો પત્ર મળતા,
ટેરવાં મોઘમ કવાયત બહુ કરે છે.
કોઈ મોઘમ આવ-જા બન્ને તરફ છે,
પ્રેમની આબોહવા બન્ને તરફ છે.
– ડૉ. પરેશ સોલંકી
Vinod Manek 'Chatak' said,
July 5, 2024 @ 11:46 AM
સરસ વીણેલા મોતી… અભિનંદન પરેશ સોલંકી
Varij Luhar said,
July 5, 2024 @ 12:04 PM
ખૂબ સરસ શેર માણવા મળ્યા
Dr Nitesh Shah said,
July 5, 2024 @ 12:38 PM
ડોક્ટર પરેશભાઈ સોલંકી
અભિનંદન
ખરેખર દિલ માંથી નીકળેલા શબ્દો દિલની સોસરવા નીકળી જાય તેવા છે
અને દિલો દિમાગ પર છવાઈ જાય છે
ફરીથી અભિનંદન
Dr Mahendra B.Jaggad said,
July 5, 2024 @ 5:00 PM
“વીણેલા મોતી” શેર પરથી ડૉ. પરેશભાઈમાં એક અત્યંત સંવેદનશીલ અને સહજ દ્રવી ઉઠતા મનુષ્યની સહૃદય હાજરી પડાવ નાખીને બેઠી છે તેનો ખ્યાલ આવે છે.
તેઓ લખે છે ” મન ઝરૂખે ને જાત પિંજરમાં, એક યોગી ગહન દ્વિધામાં છે.” યોગીના યોગ તો ગહન જ હોવાના.મન ઝરૂખે એટલે કે ઈશ્વરમાં તલ્લીન છે, જાત ભલે આ સ્થૂળ શરીરમાં હોય, તો આ યોગીના જ લક્ષણ નહીં તો બીજું શું?
” કોઈ આ વૃક્ષની ઘેઘૂરતા છેદી ગયું–” વાળા શેરમાં કવિ કેટલા ઋજુ હ્રદયના છે, તેનો સ્પષ્ટ ચિતાર થાય છે. ખૂબ ખૂબ અભિનંદન 👌👌🌹🌹
મનીષા મહેતા (ધરા ) said,
July 5, 2024 @ 5:25 PM
આખી જ ગઝલ બેમિસાલ.
Parbatkumar Nayi said,
July 7, 2024 @ 12:28 PM
વાહ
ખૂબ સરસ કલેક્શન
લતા હિરાણી said,
July 14, 2024 @ 6:09 PM
મજાનાં શેર