તે કોણ છે? – રમેશ પટેલ ‘ક્ષ’
સ્તબ્ધ આંખોથી મને જોયા કરે તે કોણ છે ?
ને પછી દૃષ્ટિ થકી પળમાં સરે તે કોણ છે ?
સાવ સુક્કું વૃક્ષ છે ને સાવ સુક્કી ડાળ છે,
પર્ણ જેવું કંઈ નથી તોપણ ખરે તે કોણ છે ?
મેં અચાનક આંખ ખોલી ને ગગન જોઈઃ કહ્યું,
શર્વરીના કેશમાં મોતી ભરે તે કોણ છે ?
આમ તો ઝરણાં હંમેશાં પર્વતોમાંથી સરે,
તે છતાં આ રણ મહીં ઝરમર ઝરે તે કોણ છે ?
જળ મહીં તરતાં રહે સરતાં રહે એ મત્સ્ય, પણ
મત્સ્યની આંખો મહીં જે તરવરે તે કોણ છે ?
સહુ મને દફ્નાવવાને આમ તો આતુર, પણ
આ ક્ષણે મુજ શ્વાસમાં આવી ઠરે તે કોણ છે ?
– રમેશ પટેલ ‘ક્ષ’
pragnajuvyas said,
November 17, 2021 @ 9:28 AM
સહુ મને દફ્નાવવાને આમ તો આતુર, પણ
આ ક્ષણે મુજ શ્વાસમાં આવી ઠરે તે કોણ છે ?
વાહ્
– રમેશ પટેલ ‘ક્ષ’ની સરસ ગઝલ
praheladbhai prajapati said,
November 17, 2021 @ 9:29 AM
VERY NICE IMMEJINATION
saryu parikh said,
November 17, 2021 @ 9:36 AM
વાહ્! બહુ સરસ.
સરયૂ પરીખ
વિવેક said,
November 19, 2021 @ 1:31 AM
મજાની ગઝલ…