(પછી) – હિમલ પંડ્યા
સાચવી, સમજી-વિચારીને પછી,
મેંય મૂકી જીદ હારીને પછી.
ખૂબ પસ્તાવાનું થાતું હોય છે,
કોઈને પોતાનું ધારીને પછી.
તૂટતા સપનાને જોવાનું, અને –
બેસવાનું મનને મારીને પછી.
એ નજરને ફેરવી નીકળી ગયાં!
ખૂબ સમજાવી મેં બારીને પછી.
લાગશે, હળવાશ નક્કી લાગશે
કાંચળી જૂની ઉતારીને પછી.
જિંદગીને મેંય અપનાવી લીધી,
આંસુઓ બે-ચાર સારીને પછી.
– હિમલ પંડ્યા
સહજ ભાષામાં જે વાત ગઝલ કરી શકે છે, એ વિદ્વત્તાસભર વાણી ઘણીવાર કરી નથી શકતી. આ ગઝલ એનું ઉત્તમ ઉદાહરણ છે. બધા જ શેર સરળ ભાષામાં ગહન વાત કરે છે…
vimala Gohil said,
September 23, 2019 @ 7:25 PM
“લાગશે, હળવાશ નક્કી લાગશે
કાંચળી જૂની ઉતારીને પછી.”
MAHESHCHANDRA THAKORLAL NAIK said,
September 23, 2019 @ 11:28 PM
સરસ હળવી ફુલ જેવી સહજ શબ્દોમા ઘણુ બધુ કહેતી ગઝલ
કવિશ્રીને અભિનદન…..આપનો આભાર…..
yogesh shukla said,
September 26, 2019 @ 11:02 AM
પહેલો શેર અને અંતિમ શેર લાજવાબ ,,,