(ઢબૂરી ઢબૂરીને) – ડૉ. મનોજ જોશી ‘મન’
ઢબૂરી ઢબૂરીને રાખેલ સપનાં,
જગાડો ને જાગો પછી થાય ખપનાં!
અમે ચાને ચુસ્કીઓ લઈલઈને પીધી,
તમે ધીમે રહીને પૂછ્યા ભાવ કપના!
અમે નામ ધબકારે-ધબકારે લીધું,
તમે પુસ્તકો ચીતર્યાં નામજપનાં.
ન પૂર્વે ભૂમિકા, ન પ્રસ્તાવના કંઈ;
મને જોઈએ તું; બીજી કોઈ લપ ના!
ગુફામાં કે જંગલમાં જઈને શું કરશો?
ફરજથી વધી ક્યાંય પણ કોઈ તપ ના!
– ડૉ.મનોજ જોશી ‘મન’
કેવળ સૂતેલ સ્વપ્નોને જગાડવું પૂરતું નથી. આપણે ન જાગીએ ત્યાં સુધી બધું નકામું. ‘પ્રાઇઝ ટેગ’ની ચિંતામાં ડૂબેલા જિંદગી માણવાનું ચૂકી જાય છે. ત્રીજો શેર તો રામમંદિર શિલાન્યાસના ટાંકણે ખૂબ જ સંતર્પક બની રહે છે. ઈશ્વરને હૃદયમાં ઘર આપ્યું હોય એ બીજાઓ જોઈ શકે એવી દેખાડાની તપસાધના કરતાં વધુ અગત્યનું છે. છેલ્લો શેર પણ આ વાત સાથે એક કડી વધારાની જોડી આપે છે. એમાં ઝેન સાધનાનો સિદ્ધાંત પણ નજરે ચડે છે.
Daxa sanghavi said,
January 18, 2024 @ 2:22 PM
વાહ સાદ્યંત સુંદર ગઝલ. કોઈ તપ ના… ક્યા બાત
DILIPKUMAR CHAVDA said,
January 18, 2024 @ 2:23 PM
વાહ વાંચતાવેંત સાહજિક આનંદ થાય એવી મજાની રચના
ન પૂર્વે ભૂમિકા, ન પ્રસ્તાવના કંઈ;
મને જોઈએ તું; બીજી કોઈ લપ ના!
આ શેર તો શિરોમણી
Minaxi Bhailal soni said,
January 18, 2024 @ 2:30 PM
ખૂબ ખૂબ સરસ રચના
Pinki said,
January 18, 2024 @ 8:03 PM
વાહ… મીરા જેવી લત … બીજી કોઈ લપ ના !!
કંઈક ભાળી ગયેલા જીવને કશુંક પામવાની કેવી ઘેલછા !!
Prabhakar Dholakia said,
January 19, 2024 @ 9:17 AM
અમે ભાવ પૂછતા..
સરસ પ્રાસંગિક રચના
Poonam said,
February 2, 2024 @ 12:56 PM
ગુફામાં કે જંગલમાં જઈને શું કરશો?
ફરજથી વધી ક્યાંય પણ કોઈ તપ ના! Bahoot ache.
– ડૉ.મનોજ જોશી ‘મન’
રશ્મિ અગ્નિહોત્રી said,
March 2, 2024 @ 6:02 PM
અમે ચાને ચુસ્કીઓ લઈલઈને પીધી,
તમે ધીમે રહીને પૂછ્યા ભાવ કપના!
જીવનરસ માણી લેવો… કપની લપમાં ન પડવું…’મરીઝ’ કહે છે ને, ઓછી મદિરા અને ગળતું જામ…. !!