આત્મદીપો ભવ – – ભોગીલાલ ગાંધી ‘ઉપવાસી’
તું તારા દિલનો દીવો થા ને, ઓ રે ઓ રે ઓ ભાયા! તું તારાo
રખે કદી તું ઉછીનાં લેતો, પારકાં તેજ ને છાયા;
એ રે ઉછીનાં ખૂટી જશે ને, ઊડી જશે પડછાયા… તું તારાo
કોડિયું તારું કાચી માટીનું, તેલ-દિવેલ છુપાયાં;
નાની-શી સળી અડી ન અડી, પરગટશે રંગમાયા… તું તારાo
આભમાં સૂરજ, ચંદ્ર ને તારા, મોટા મોટા તેજરાયા;
આતમનો તારો દીવો પેટાવવા, તું વિણ સર્વ પરાયાં.. તું તારાo
– ભોગીલાલ ગાંધી ‘ઉપવાસી’
લયસ્તરો તરફથી સર્વ કવિમિત્રો તેમજ વાચકમિત્રોને દિપોત્સવી પર્વનાં ખૂબ ખૂબ વધામણાં…
આપણી ભાષાની અજરામર રચના. ભાગ્યે જ કોઈ ગુજરાતી એવો હશે જેણે આ રચના ગાઈ-સાંભળી નહીં હોય. વિશ્વકવિતાની હરોળમાં અગ્રિમ સ્થાન પામી શકે એવી આ ગીતરચના સરળ પદાવલિ અને સહજ પ્રતીકોના વિનિયોગને લઈને જનમાનસમાં પ્રાર્થનાનું સ્થાન લઈ પ્રકાશી રહી છે.
Pragnaju said,
November 12, 2023 @ 8:29 PM
સર્વ કવિમિત્રો , વાચકમિત્રો અને લયસ્તરોને દિપોત્સવી પર્વનાં ખૂબ ખૂબ વધામણાં
કવિશ્રી ભોગીલાલ ગાંધી ‘ઉપવાસી’નુ ખૂબ ગમતું પ્રાર્થના ગીત માણી આનંદ
માણો
…
Dr Bhuma Vashi said,
November 15, 2023 @ 3:04 PM
સરળતામાં સૌંદર્ય. વાહ.
Poonam said,
November 17, 2023 @ 9:33 AM
આતમનો તારો દીવો પેટાવવા, તું વિણ સર્વ પરાયાં.. તું તારાo
– ભોગીલાલ ગાંધી ‘ઉપવાસી –
Saral ne Sundar !
Lata HIrani said,
November 21, 2023 @ 6:04 PM
હૈયે ને હોઠે વસેલી પ્રાર્થના