ન શોધો ક્યાંય પણ એને – મધુસૂદન પટેલ ‘મધુ’
ન શોધો ક્યાંય પણ એને કે એ તો આંખ આગળ છે,
હવાના ગર્ભમાં જળ છે, ને સાબિતી એ ઝાકળ છે.
ગદાઓ ભીમની હું એકસો ને એક લાવું, પણ,
થયો છું સહેજ નાસીપાસ કે અગણિત સાથળ છે.
કદી પહોંચે તો આપોઆપ હોડી થઈને તારે છે,
કવિતા મૂળ તો એણે લખેલો એક કાગળ છે.
કદી માટી મહીં ભળતું, કદી સંતાતું આકાશે,
એ પાણી એ જ પાણી છે, બસ એનું નામ વાદળ છે.
‘મધુ’ એ રૂપ છે, ને એય તે તારા જ મનનું છે,
તને લાગે છે, તારા મનની ફરતે કોઈ સાંકળ છે.
– મધુસૂદન પટેલ ‘મધુ’
લયસ્તરો પર કવિના નૂતન સંગ્રહ ‘રજવાડું’નું સહૃદય સ્વાગત…
રોજબરોજની નાનીનાની ઘટનાઓ, જેના તરફ આપણે જોવાનુંય છોડી દીધું હોય, એ જ નાનીનાની ઘટનાને નવતર કલેવર બક્ષીને રજૂ કરી શકે એ જાદુનું જ બીજું નામ કવિતા… પ્રાતઃકાળે ભેજવાળી હવા ઠરે અને શૂન્યમાંથી ઝાકળબુંદ પ્રકટ થાય એ વૈજ્ઞાનિક તથ્ય પણ કવિતાનું રૂપ ધારણ કરે તો કેવું મનહર બની શકે છે, નહીં! ગમે એટલી કોશિશ કરો તોય હવાના ગર્ભમાં છૂપાયેલું આ જળ જોઈ શકાતું નથી. ઝાકળના મિષે કવિ કદાચ ઈશ્વરના અસ્તિત્ત્વનો રહસ્યસ્ફોટ પણ કરવા ચહે છે. હૃદયમાં શ્રદ્ધા ઘનીભૂત થઈ ઠરે તો જ ઈશ્વર નજરે ચડે, ખરું ને? કવિતા બીજું કશું નહીં, ઈશ્વરે લખેલો કાગળ છે. મોટાભાગની કવિતાઓમાં આજે કળાકારી ઓછી અને કારીગરી વધારે જોવા મળે છે. કવિહૃદય સુધી પહોંચતી કવિતા જો સાચી હશે તો ઈશ્વરનો આ કાગળ હોડી બનીને ભવસાગર તારશે એ નક્કી.
Vipul said,
July 20, 2023 @ 12:05 PM
Very good, matla is too good
kusum kundaria said,
July 20, 2023 @ 12:31 PM
વાહ ખૂબ સરસ
Shah Raxa said,
July 20, 2023 @ 2:02 PM
વાહ..વાહ..ખૂબ સરસ🙏💐
DILIPKUMAR CHAVDA said,
July 20, 2023 @ 2:44 PM
વાહ નાવિન્ય સભર ગઝલ
PRAVIN SHAH said,
July 20, 2023 @ 6:53 PM
ખૂબ સરસ !
Kaushik Thaker said,
July 20, 2023 @ 8:54 PM
વાહ ભાઈ વાહ..સરસ.
Vinod Manek 'Chatak' said,
July 20, 2023 @ 9:16 PM
ખૂબજ સરસ રચના… કવિ ને અભિનંદન…
Vinod Manek 'Chatak' said,
July 20, 2023 @ 9:18 PM
અદભુત રચના… કવિને અભિનંદન
pragnajuvyas said,
July 20, 2023 @ 9:22 PM
કવિશ્રી મધુસૂદન પટેલ ‘મધુ’ની સુંદર ગઝલનો ડૉ વિવેક દ્વારા સ રસ આસ્વાદ
આખી ગઝલમાંથી એક પણ શેર નબળો ગણીને બાજુએ મૂકી શકાય એવો નથી…
વાહ કવિ! જલસા પડી ગયા
Aasifkhan said,
July 21, 2023 @ 3:17 PM
વાહ ખુબસરસ ગઝલ
વાહ
Poonam said,
July 27, 2023 @ 8:21 PM
કદી માટી મહીં ભળતું, કદી સંતાતું આકાશે,
એ પાણી એ જ પાણી છે, બસ એનું નામ વાદળ છે.
– મધુસૂદન પટેલ ‘મધુ’ –
Rajawadu Fale- Fhule tevi shubh kamanao !
Aaswad 👌🏻
Niraj Mehta said,
August 9, 2023 @ 10:05 PM
વાહ કવિ, મધુ મારા ગમતા કવિ પણ અને મિત્ર પણ.
ખૂબ અભિનંદન કવિ.
અને અભિવાદન વિવેકભાઈ.