લગ્નની વર્ષગાંઠે કોઈને પણ ગીફ્ટ કરી શકાય એવી કવિતા – એષા દાદાવાળા
એનીવર્સરી
એ
વસંત જેવી છે
સાથે જીવાય ગયેલા
સહેજ લીલા સહેજ પીળા થયેલા વર્ષોને
એ આખેઆખા લીલા કરી જાય છે
જોકે
વસંતના આગમનની સાબિતી તો
શહેરમાં હારબંધ ઉભા કરેલા વૃક્ષો લીલો યુનિફોર્મ પહેરી લે
ત્યારે જ મળે,
બાકી
સાથે જીવાયેલા વર્ષોના સહેજ
ઝાંખા થયેલા ખૂણે
એકાદું ફૂલ ઉગી નીકળે
એ પ્રત્યેક પળ વસંત જેવી જ હોય છે.
લગ્નની વર્ષગાંઠ તો
વસંતને આવકારવાનું બહાનું છે
બાકી
સાથે જીવવાનું નક્કી કરીને બેઠેલા
બે જણ સાથે હોય
એ પ્રત્યેક પળે
શરીરની ડાબી બાજુએ
એકાદું ફૂલ ઉગતું જ હોય છે
અને ત્યારે વસંતના આગમનની સાબિતીની જરૂર પડતી નથી..!
– એષા દાદાવાળા
pragnajuvyas said,
May 25, 2022 @ 9:05 PM
કવયિત્રી અને પત્રકાર એષા દાદાવાળા અછાંદસ કાવ્યપ્રકારમાં નોંધનીય કામ કરી જાણે છે.
‘એનીવર્સરી’ મઝાની અભિવ્યક્તિ!
Lata Hirani said,
May 26, 2022 @ 8:27 AM
વાહ એષા
Harihar Shukla said,
May 26, 2022 @ 10:05 AM
ઓહો, મોજ👌
આજે અમારી એનિવર્સરી છે 👍
પ્રજ્ઞા વશી said,
June 4, 2022 @ 6:41 PM
સરસ કવિતા
અભિનંદન એષા દાદાવાળા.
Neetin Vyas said,
June 8, 2022 @ 12:45 AM
એશાબેન, તમારી સાથે સંમત છું: “લગ્નની વર્ષગાંઠે કોઈને પણને પ્રેમ સાથે ભેટ ધરી શકાય એવી કવિતા” જ છે
Lata Hirani said,
June 9, 2022 @ 2:15 PM
એષા એટલે એષા