નહીં મળું – કિશોર વાઘેલા
આ પથ ઉપર ફરી હું સફરમાં નહીં મળું;
અર્થો તરફ ગયો છું, શબદમાં નહીં મળું.
એવું બને કે સ્પર્શ થતાં હું ખરી પડું,
આકારના જગતની જણસમાં નહીં મળું.
આધીન તમારે કંઠ બધા હો ભલે સૂરો,
ગાઈ શકો સહજ એ તરજમાં નહીં મળું.
આ સૂર્યના કિરણને પ્રસવ આપજે હવે,
ચમકાર છું જીવનના તમસમાં નહીં મળું.
શોધી શકો કદાચ હવામાં અવાજમાં,
હું સત્ય છું કદીય ભરમમાં નહીં મળું.
– કિશોર વાઘેલા
pragnajuvyas said,
November 18, 2021 @ 4:32 PM
સ રસ ગઝલ
યાદ આવે જવાહર બક્ષી
તારાપણાના શહેરમાં જો તું મને શોધ્યા કરે તો હું તને કયાંથી મળું ?
આમ આયનાના શહેરમાં જો તું મને શોધ્યા કરે તો હું તને કયાંથી મળું ?
વિવેક said,
November 19, 2021 @ 1:30 AM
સરસ રચના…
Maheshchandra Naik said,
November 20, 2021 @ 3:03 PM
નહી મળવાની વાત ખુબ જ માર્મિક….