આ દેખાય છે તેવી નથી….- લલિત ત્રિવેદી
બહુ જ અંગત વાત આ દેખાય છે તેવી નથી
એક જણની રાત આ દેખાય છે તેવી નથી
છેવટે તો હાથમાં ગજરો સુકાતો હોય છે
સાંજની શરૂઆત આ દેખાય છે તેવી નથી
ઊખડે છે પડ કદી તો અશ્મિઓ દેખાય છે
ટેરવે રળિયાત આ દેખાય છે તેવી નથી
છે બહુ લાવણ્યમય શરૂઆત કોઈ ભેદની
ઓસની રજૂઆત આ દેખાય છે તેવી નથી
સાંજ પડતાં કેમ એ પાછો ફરે છે ઘર તરફ ?
કેમ એની વાત આ દેખાય છે તેવી નથી ?
ઊંડાં ભમ્મર પાણીમાં મોતી જ ચળકે તે પછી
ધ્યાન ધ૨ કે જાત આ દેખાય છે તેવી નથી
કેટલાં સપનાં અને ઘટનાઓનો ઇતિહાસ છે !
આપણી નિરાંત આ દેખાય છે તેવી નથી
સુસવાટા હો કવનના કે ખૂણાની જ્યોત હો
કયાં ખૂલે છે રાત આ દેખાય છે તેવી નથી.
– લલિત ત્રિવેદી
ખરી વાત છે…. ન માણસ, ન સંબંધ, ન ઘટના, ન વિચાર, ન સમાજ….- કશુંય દેખાય તેવું નથી હોતું. કદાચ ક્ષતિ મારી સમજની જ છે….
Ketan Bagatharia said,
September 21, 2021 @ 5:35 AM
Very nice 🙏
pragnajuvyas said,
September 21, 2021 @ 1:56 PM
કવિશ્રી લલિત ત્રિવેદીએ કહેલી આ પંક્તિઓ યાદ આવે
કાગળિયાની નાતને જમવા તેડી છે જી,
ગાલિબ ! તારા કારજમાંથી ગઝલ ઘડું છું…જ્યારે ગઝલની વાત આવે ત્યારે તો એ ખુબ જ અમૂલ્ય છે, જેથી જો માનવામાં આવે કે એક સારી ગઝલ સરળતાથી મળી જશે તો એ ખોટો વિચાર હશે, એના માટે કવિ લલિત ત્રિવેદી જેવું ખુબ ઊંચું નિશાન હોવું ખુબ જ જરૂરી છે.
બહુ જ અંગત વાત આ દેખાય છે તેવી નથી
એક જણની રાત આ દેખાય છે તેવી નથી
વાહ્