બીજું શું જોઈએ – હિરેન ગઢવી
લય, તાલ, સ્વરમાં હોઈએ, બીજું શું જોઈએ,
આઠે પ્રહરમાં હોઈએ, બીજું શું જોઈએ !
દીવાલ બોલવા ચહે આધારની કથા,
એ વખતે ઘરમાં હોઈએ, બીજું શું જોઈએ !
જે ચાહે તે પહોંચી શકે આપણા સુધી,
કાયમ એ સ્તરમાં હોઈએ, બીજું શું જોઈએ !
જેને નશામાં રાખે સ્વયંની જ જાગૃતિ,
એની અસરમાં હોઈએ, બીજું શું જોઈએ !
તારા થયાની ઘોષણા કરવાનું થાય મન,
ત્યારે સબરમાં હોઈએ, બીજું શું જોઈએ !
નિર્દોષ જો નહીં તો ગુનેગારની રીતે,
એની નજરમાં હોઈએ, બીજું શું જોઈએ !
‘હોવાની’ જેમાં કંઈ જ જરૂરત પડે નહીં,
એવી સફરમાં હોઈએ, બીજું શું જોઈએ !
– હિરેન ગઢવી
સાદ્યંત સુદર ગઝલ. ‘બીજું શું જોઈએ’ જેવી રદીફને તંતોતંત નિભાવતા મેઘધનુષી સાત શેર. હળવે તે હાથ, નાથ! મહીડા વલોવજો…
પૂર્વી બ્રહ્મભટ્ટ said,
July 30, 2021 @ 4:05 AM
ખૂબ જ મજાની ગઝલ
દરેક શેર ખૂબ સરસ થયા છે
આવી સુંદર ગઝલ બદલ કવિ મિત્ર હિરેનભાઈને અભિનંદન
હરીશ દાસાણી. said,
July 30, 2021 @ 6:19 AM
નિરપેક્ષતાની મસ્તી અને મિજાજ
Maheshchandra Naik said,
July 30, 2021 @ 3:25 PM
સરસ ગઝલ…
pragnajuvyas said,
July 30, 2021 @ 4:50 PM
સુંદર ગઝલ
સોનેરી સાંજ, ક્ષિતિજ ને તારો સાથ,. બીજું શું જોઈએ ?
સાગર, એક નાવ ને, હાથમાં તારો હાથ,.બીજું શું જોઈએ ?
Lata Hirani said,
August 7, 2021 @ 2:04 AM
આવેી સરસ મજાનેી ગઝલ વાન્ચવા મળે પચ્હિ બીજ શુ જોઇએ ? (અહેી ટાઇપ કર્યુ)