પર્વત પર પાછું ચડવાનું – હરીશ મીનાશ્રુ
પર્વત પર પાછું ચડવાનું
નદીપણું નિશ્ચે નડવાનું
સવાર પડતાં ફાળ પડે છે
અજવાળું અઘરું પડવાનું
ઓરમાન માટીમાં તારું
બીજ જનમભર તરફડવાનું
પવન ઉપર નકશા ખુશ્બૂના
તું શોધે થાનક વડવાનું
દરદ સહુનું સહિયારું છે
શું પૂનમનું શું પડવાનું
શું કરશો કે એક સફરજન
મનમાં પડ્યું પડ્યું સડવાનું
પાણીને ના પડે ઉઝરડો
એમ સરોવરને અડવાનું
ભાષાનો ભાંગી કર ભૂક્કો
એ જ બને કારણ ઘડવાનું
સાવ સાંકડા ઘરમાં સંતો
યાયાવર થઈને ઊડવાનું
– હરીશ મીનાશ્રુ
ટૂંકી બહેરની મજબૂત રચના…દરેક શેર એક સ્વતંત્ર વિચારને બળકટ રીતે રજૂ કરે છે….
