ગાલિબને મારા શેર નથી વાંચવા મળ્યા ! – ભરત વિંઝુડા
અફસોસ કેટલાય મને આગવા મળ્યા
ગાલિબને મારા શેર નથી વાંચવા મળ્યા !
જોવા મળ્યા નથી કે નથી જાણવા મળ્યા
ઈશ્વર અહીં બધાને ફકત ધારવા મળ્યા !
પગ પર ઊભાં રહીને જુએ છે બધાં મને
જાણે કે પગ મને જ ફકત ચાલવા મળ્યા !
આંખો મળી છે દ્રષ્યને ઝીલી બતાવવા
ચશ્મા જરાક એમાં મદદ આપવા મળ્યાં !
ઊંચાઈ બેઉમાંથી વધું કોની હોય છે
ભેટી પડ્યાં ને એવી રીતે માપવા મળ્યાં !
રાતો વિતાવવા જ મળી સાવ એકલા
ને ભીડની વચાળે દિવસ કાપવા મળ્યા !
તસવીરમાં છે હાથ મિલાવેલી એક ક્ષણ
ને એ જ ક્ષણમાં દૂર હંમેશાં જવા મળ્યાં !
– ભરત વિંઝુડા
આ શાયરને સાંભળવા એ એક લ્હાવો છે…..એકદમ expressionless સપાટ ધીમા અવાજે વાંચન કરે અને આપણે કાન એકદમ સરવા રાખીને સાંભળીએ તો જ સંભળાય….સરળ ભાષા એમની લાક્ષણિકતા છે. ઘણીવાર એમની સરળતા છેતરામણી પણ હોય છે….ઉદાહરણ રૂપે બીજો શેર જુઓ !
Sandip Pujara said,
April 3, 2018 @ 4:15 AM
ખરેખર… સરસ ગઝલ છે…..
Pravin Shah said,
April 3, 2018 @ 5:49 AM
અફસોસ એટલો કે તમને નથી મળ્યા, પણ
આભાર વિવેકનો કે તમે માણવા મળ્યા !
ખૂબ સરસ !!!
સુનીલ શાહ said,
April 3, 2018 @ 9:29 AM
સુંદર ગઝલ…વાહ
MAHESHCHANDRA NAIK said,
April 3, 2018 @ 2:55 PM
સરસ,સરસ,સરસ…….ભાવવાહી ગઝલ…….કવિશ્રીને અભિનદન અને આપનો આભાર……
ATUL MEHTA said,
April 11, 2018 @ 6:48 AM
જોવા મળ્યા નથી કે નથી જાણવા મળ્યા
ઈશ્વર અહીં બધાને ફકત ધારવા મળ્યા !
હિમાલયરાજસિંહ પરમાર said,
April 18, 2018 @ 7:49 AM
તમારે એક એપ્લિકેશન બનાવવી જ જોઈએ. Must. Please.
વિવેક said,
April 19, 2018 @ 1:52 AM
@ હિમાલયરાજસિઁહ:
આપની વાત સાચી છે….