આયનો ચૂમી રહ્યો છું ! – શૈલ પાલનપુરી
હું તને સમજી રહ્યો છું;
આયનો ચૂમી રહ્યો છું !
પ્રેમ પણ કેવી નિસરણી ?
તારલા તોડી રહ્યો છું !
કોણ કહે છે નગ્ન છું હું ?
રોશની પ્હેરી રહ્યો છું !
લાજ રાખું છું સૂરાની;
નિજ તરસને પી રહ્યો છું.
રાહ ખુદ દોડ્યા કરે છે,
રાહમાં બેસી રહ્યો છું.
શૂન્યનો છું ‘શૈલ’ ચેલો,
એકડો ઘૂંટી રહ્યો છું.
– શૈલ પાલનપુરી
પહેલો શેર ગઝલનો શિરમોર શેર (મારી દૃષ્ટિએ!) છે. સામાને સમજવાની પ્રક્રિયામાં મોટેભાગે માણસ પોતાનું જ પ્રતિબિંબ શોધતો હોય છે ! આગળ રજૂ કરેલી વિખ્યાત કવિતા દિલોજાનમાં આવી જ વાત હળવા અંદાજમાં રજૂ કરેલી છે.
