નચાવશે જોજે! – સંજુ વાળા
પ્રવાહમય છે સમય, આવશે—જશે, જોજે!
પ્રતીતિરૂપે દીવાલોય ઝૂમશે, જોજે!
કળીની જેમ એ હસ્તી ઉઘાડશે, જોજે!
પછીથી એમાં તને તું જ ભાળશે, જોજે!
કદી એ સ્થિતિએ તું મીટ માંડશે, જોજે!
જ્યાં આપમેળે બધું ગાશે—વાગશે, જોજે!
સરળતાથી જ બધે એ હા—ના નથી કહેતાં
જવાબ દેશે તે પહેલાં થકાવશે, જોજે!
પિયાવો રામ-રસાયણનો માંડી બેઠા છે
તું ત્યાં જશે તો જરૂર પિવડાવશે, જોજે!
અસર ને આડઅસર જાણી પાડજે અક્ષર
નહીં તો એ જ તને બહુ ડરાવશે, જોજે!
પ્રતીકો—કલ્પનોનાં જાળાં ક્યાં જરૂરી છે?
ગઝલ તો ભાવ—ભૂખી છે, નચાવશે, જોજે!
– સંજુ વાળા
લયસ્તરો પર ‘કંઈક/કશુંક/અથવા તો…’ની સંવર્ધિત આવૃત્તિને સહૃદય આવકાર…
ગઝલની રદીફ આમ તો સાવ ટૂંકી ને ટચરક છે, પણ દરેક શેરના ભાવવિશ્વ માટે એ પોષક સિદ્ધ થાય છે. આમ તો આખી ગઝલ સ્વયંસિદ્ધ છે, પણ બીજા શેરમાં અહમ્ બ્રહ્માસ્મિની આહલેક સાંભળવાનુંચૂકાય નહીં એ જોજો… (જોજે!)
Ramesh Maru said,
January 10, 2025 @ 11:49 AM
સુંદર ગઝલ…
Dhruti Modi said,
January 11, 2025 @ 4:42 AM
વાહ, સરસ ગઝલ !
અસરને આડઅસર જાણી પાડજે અક્ષર
નહીં તોએ જ તને બહુ ડરાવશે, જોજે !
શૈલેશ ગઢવી said,
January 11, 2025 @ 8:49 PM
વાહ, સ્વાગત સંવર્ધિત આવૃત્તિનું
સંજુ વાળા said,
January 13, 2025 @ 11:38 AM
ખૂબ ખૂબ આભાર વિવેક
મિત્રોનો પણ આભાર
Poonam said,
March 11, 2025 @ 12:08 PM
અસર ને આડઅસર જાણી પાડજે અક્ષર
નહીં તો એ જ તને બહુ ડરાવશે, જોજે!
– સંજુ વાળા –
Aaswaad