(મિજાજ લાવી છે) – ડૉ. પરેશ સોલંકી
લાખ કોશિશ બાદ આવી છે,
સાદગી પણ મિજાજ લાવી છે.
થાક ઊંચાઈ પર બહુ લાગ્યો,
હા, તળેટી ચરણને ફાવી છે.
વેરવિખેર જાત સંકોરી,
છેવટે વસ્ત્રમાં દબાવી છે.
ક્ષણ, સ્મરણ, રટણ તથા વળગણ,
પત્રમાં સૌ વિગત જણાવી છે.
ચાલ, ઈશ્વર બતાવ હયાતીને,
કે મુરત પથ્થરે સજાવી છે.
– ડૉ. પરેશ સોલંકી
લયસ્તરો પર કવિના નવ્યસંગ્રહનું સહૃદય સ્વાગત…
સંગ્રહમાંથી એક સરસ મજાની ગઝલ આપ સહુ માટે રજૂ કરીએ છીએ. એકાદ-બે છંદદોષને બાદ કરતાં આખી ગઝલ મનનીય થઈ છે. સરળ બાનીમાં કવિએ આસ્વાદ્ય શેર આપ્યા છે.
Varij Luhar said,
June 7, 2024 @ 12:53 PM
વાહ.. સરસ ગઝલ
Vinod Manek 'Chatak' said,
June 7, 2024 @ 2:06 PM
ખૂબ સરસ ગઝલ. નવા ગઝલ સંગ્રહને આવકાર, રાજીપો