સાંજ – નયન દેસાઈ
આભની ડાળી ઉપર સૂરજનું ફળ પાકી ગયું,
ઝુંડ એકલતાનું આવી ક્યાંકથી ચાખી ગયું.
બોલ મારા આ જનમને તે જનમના ભાગિયા;
કોણ ઉમ્બર ૫ર અધૂરી સાંજ આ નાખી ગયું ?
આજ પાછી યાદની અગ્નિવીણા વાગી ઊઠી;
સ્વપ્નવત્ હિરણ્યમય આકાશ એક દાઝી ગયું.
આ ધુમાડો થઈ ગઈ તે સાંજ કે સ્વપ્ન હતું ?
શ્વાસના તળિયે સૂતેલું કો’ક જણ ચોંકી ગયું.
ગંધ – શબ્દો – સ્પર્શ ધુમાડો ધુમાડો થઈ જશે;
વારસાગત આ નગર નિયમ મુજબ સળગી ગયું.
લોક ધુમાડાની સાથે વાત પણ કરતું નથી;
લોક ધુમાડાના ઝાંપે આવીને અટકી ગયું.
હું નદીવત્ હું નદીવત્ મંત્રના ઉદ્ગાર હે !
સપ્તસિંધુનું ફરી મોજું મને ભીંજવી ગયું.
બારણે બાંધેલ પડછાયાનું તોરણ – સળવળ્યું;
બારણે બુઝાયેલું આકાશ કો’ ટાંગી ગયું.
ધૂળથી તે આભમાં સૂરજની છાતી વચ્ચોવચ્ચ;
મંદ પગલે કોઈ આવી સાંજ પ્રગટાવી ગયું.
– નયન દેસાઈ
નયન દેસાઈની રચના વાંચો અને કંઈ સાવ જ અનોખું હાથ ન લાગે તો જ નવાઈ. મૌલિકતાથી છલોછલ આ માણસને ભાષાદેવીએ સામે ચાલીને વરમાળા પહેરાવી હોવી જોઈએ, એ વિના ભાષામાં આવું પોત પ્રકટે ક્યાંથી? ગઝલશાસ્ત્રીઓ આ ગઝલમાંથી કાફિયાદોષ શોધી કાઢશે, પણ ગઝલના દરેકેદરેક શેરમાં કવિએ જે વાતાવરણ બાંધી બતાવ્યું છે એનો કોઈ તોડ ખરો એમની પાસે? ગઝલના એકેય શેર ટિપ્પણીના મહોતાજ નથી. પણ એકેય શેરને ત્રણ-ચાર વાંચ્યા વિના આગળ ન વધવા નમ્ર વિનંતી છે… વાંચો, ફરી વાંચો, મમળાવો અને જુઓ ખરી મજા!
Bharati gada said,
April 20, 2024 @ 12:05 PM
ખૂબ સુંદર લાજવાબ રચના 💐 એમની બધી જ રચનાઓ એક સે બઢકર એક હતી
DILIPKUMAR CHAVDA said,
April 20, 2024 @ 12:20 PM
વાહ સાંજ પ્રગટાવી ગયું…
જોરદાર રચના
Aasifkhan Pathan said,
April 20, 2024 @ 12:26 PM
નયનભાઈ તો નયનભાઈ વાહ
શ્વેતા તલાટી said,
April 20, 2024 @ 12:46 PM
Vaah .
Vinod Manek said,
April 20, 2024 @ 2:00 PM
લાજવાબ ગઝલ… બધાં શેર જોરદાર
Harihar Shukla said,
April 20, 2024 @ 3:24 PM
સરસ ગઝલ 👌
કાફિયા દોષ વાળા ચાર શેર ન રાખીને પાંચ શેરની દોષ મુક્ત ગઝલ કવિ આપી શક્યા હોત .
Dhruti Modi said,
April 21, 2024 @ 2:37 AM
વાહ, ખરેખર કંઈક નવું કહેવાની પ્રતિભા નયનભાઈની દરેક રચનામાં જોવા મળે છે !
આ કાવ્યમાં પણ એ સહજ પ્રતિભા નજરે પડે છે !
આભની ડાળી ઉપર સૂરજનું ફળ પાકી ગયું !
ઝૂંડ એકલતાનું ક્યાંકથી આવી ચાખી ગયું !
વાહ !
બોલ મારા આ જનમને તે જનમના ભાગિયા;
કોણ ઉમ્બર પર અધૂરી સાંજ આ નાંખી ગયું !
Poonam said,
April 30, 2024 @ 12:38 PM
આજ પાછી યાદની અગ્નિવીણા વાગી ઊઠી;
સ્વપ્નવત્ હિરણ્યમય આકાશ એક દાઝી ગયું. Waah !
– નયન દેસાઈ –