કહેવાય એમ ક્યાં છે? – યોગેશ પંડ્યા
તમને સ્મર્યાંનું કારણ કહેવાય એમ ક્યાં છે?
પાછું ફર્યાનું કારણ કહેવાય એમ ક્યાં છે ?
પાછો ફર્યો છું તેનું કારણ ધર્યું’તું મેં, પણ
કારણ ધર્યાનું કારણ કહેવાય એમ ક્યાં છે?
મારા જ હાથે ખુદની હસ્તી મિટાવી દીધી,
બાકી મર્યાનું કા૨ણ કહેવાય એમ ક્યાં છે?
કાય૨ નથી જ કિન્તુ રહેવું પડ્યું છે મૂંગું,
ભૂલો કર્યાનું કારણ કહેવાય એમ ક્યાં છે?
તેની કથાને વાંચી રોઈ પડ્યો’તો કિન્તુ
આંસુ ઝર્યાનું કારણ કહેવાય એમ ક્યાં છે?
અંગત છો, નહીં તો જાણું: ઉપવન ઉજાડ્યો કોણે?
ફૂલો ખર્યાંનું કારણ કહેવાય એમ ક્યાં છે?
– યોગેશ પંડ્યા
અલગ-અલગ પ્રકારની દુવિધાઓ જીવનનો ન નિવારી શકાય એવો હિસ્સો છે. ડગલે ને પગલે ડાબે જવું કે જમણેની દ્વિધા આપણને અસમંજસમાં મૂકતી રહે છે. ઘણીવાર કશું કર્યા કે ન કર્યા બાબતે જવાબ હોવા છતાં જવાબ આપી ન શકાય એવી પરિસ્થિતિમાં આપણે સહુ મૂકાતા હોઈએ છીએ. કારણ ખબર હોવા છતાં કારણ ન આપી શકાવાની લાગણીના અલગ-અલગ રંગોને કવિએ પ્રસ્તુત રચનામાં બખૂબી ઉજાગર કરી બતાવ્યા છે. પ્રસ્તુત રચના ઘાયલના ‘કારણ નહીં જ આપું, કારણ મને ગમે છે’થી આપણને એક કદમ આગળ લઈ જતી હોવાનું અનુભવાયા વિના નહીં રહે.
Harihar Shukla said,
June 23, 2023 @ 11:10 AM
વાહ, સરસ ગઝલ👌
લલિત ત્રિવેદી said,
June 23, 2023 @ 11:30 AM
વાહ વાહ
નેહા said,
June 23, 2023 @ 11:52 AM
વાહ, મજાની કૃતિ.
હર્ષદ દવે said,
June 23, 2023 @ 1:51 PM
સરસ રચના
સુષમ said,
June 23, 2023 @ 2:49 PM
” एक तरफ़ उस का घर, एक तरफ़ मयकदा ” ની પરિસ્થિતિનું સર્જન
થાય ત્યારે “ગમ ભૂલવા” કે “ગમ દૂર કરવા” જેવા બીજા અનેક જવાબો હોવા છતાં આપણી અસમંજસ પરિસ્થિતિ કોઈ ઠોસ જવાબ આપવા માટે સમર્થ નથી હોતી. આ બાબતને પ્રત્યેક શૅરમાં અલગ અલગ ભાવનિરૂપણ દ્વારા કવિએ સુંદર ગઝલ રચી છે.
અભિનંદન 💐
pragnajuvyas said,
June 23, 2023 @ 7:19 PM
‘ કારણ ખબર હોવા છતાં કારણ ન આપી શકાવાની લાગણી’ અંગે અનેક રચનાઓ છે
તેવી શ્રી યોગેશ પંડ્યાની મજાની રચના આવી લાગણી સ્વરમા માણો
કમલ પાલનપુરી said,
June 23, 2023 @ 7:29 PM
વાહહહ
ખૂબસરસ ગઝલ
ઘાયલ સાહેબની યાદ આવી ગઈ…
સિકંદર મુલતાની said,
June 24, 2023 @ 2:06 PM
વાહ..સરસ ગઝલ..
Yogesh pandya said,
June 27, 2023 @ 12:12 PM
આપ સૌ મિત્રો નો ખુબ ખુબ આભાર.
માનનીય શ્રી ડો.વિવેકભાઈ એ મારી રચનાને આ પ્લેટફોર્મ ઉપર મૂકી તો ધન્ય ધન્ય!
તેમનો ખૂબ ખૂબ આભાર માનું છું
યોગેશ પંડયા,