પૃથ્વી – મનોજ ખંડેરિયા
અહીં ખંડિત થવાનો અર્થ માણસ એટલે માટી
ચહેરો તૂટવાનો અર્થ માણસ એટલે માટી
હજારો સાલ પહેલાંના મળે અવશેષ ભીતરથી
જીવનને ખોદવાનો અર્થ માણસ એટલે માટી
મલય–લ્હેરે સૂકી ઘટનાની કચારી હલબલી ઊઠી
કે ઇચ્છા મ્હોરવાનો અર્થ માણસ એટલે માટી
સતત ફરતા રહે છે ચાકનાં પૈડાંની ઝડપે સહુ
અહીંયા ઘૂમવાનો અર્થ માણસ એટલે માટી
ખૂલી વરસો પછી મુઠ્ઠી તો ચપટી ધૂળ નીકળી’તી
રહસ્યો ખોલવાનો અર્થ માણસ એટલે માટી
ઘણા વખતે અમે ઝીલ્યા છે વ્હેલી વારના છાંટા
ત્વચા મ્હેકી જવાનો અર્થ માણસ એટલે માટી
અમે તો માટીનાં પૂતળાં કે રમતાં રમતાં તૂટવાના
નથી સમજાવવાનો અર્થ માણસ એટલે માટી
– મનોજ ખંડેરિયા
ટૂંકમાં કેટલું બધું કહી દીધું !!!
praheladbhai prajapati said,
March 10, 2022 @ 4:49 AM
excelent
praheladbhai prajapati said,
March 10, 2022 @ 4:49 AM
સુન્દર્
Nehal said,
March 10, 2022 @ 4:16 PM
વાહ
હર્ષદ દવે said,
March 10, 2022 @ 5:04 PM
પંચમહાભૂતનું એક તત્ત્વ એટલે માટી. સરસ ગઝલકવિતા.