ઝુરાપાનું ગીત – અનિલ ચાવડા
ખીણ જેમ ખોદાતું જાય રોજ મારામાં સુક્કા એક ઝાડ જેમ ઝૂરવું,
સમજાવો સમજાવો કોક મને સમજાવો મારે એ કેમ કરી પૂરવું?
પડતર જમીન ઉપર એકલા ઊગીને કેમ
નીકળે આ એકએક દાડો?
મારાં આ મૂળિયામાં દિવસે ને દિવસે તો
થાતો જાય ઊંડો એક ખાડો;
બીજાની કરવી શું વાત સાલું વધતું જાય મારું મારી જ સામે ઘૂરવું.
સમજાવો સમજાવો કોક મને સમજાવો મારે એ કેમ કરી પૂરવું?
આસપાસ મુઠ્ઠીઓ વાળીને આમતેમ
રોજરોજ દોડે વેરાન,
મને ફરકાવવામાં વાયુ પણ હાંફ્યો પણ
હોય તો જ ફરકે ને પાન!
જીવનની ધાધર પર ઇચ્છાની આંગળીનું અટકે નહીં સ્હેજે વલૂરવું.
સમજાવો સમજાવો કોક મને સમજાવો મારે એ કેમ કરી પૂરવું?
– અનિલ ચાવડા
કવિએ ગીતનું શીર્ષક આપ્યું છે – ” ઝૂરાપાનું ગીત ” – શીર્ષક બધું જ કહી દે છે….
pragnajuvyas said,
January 24, 2022 @ 8:57 PM
કવિશ્રી અનિલ ચાવડાનુ સરળ શબ્દો,સીધીવાત અને સ્પષ્ટ અભિવ્યક્તિ સાથે સુંદર ગીત પ્રસ્તુત થયુ.
જીવનની ધાધર પર ઇચ્છાની આંગળીનું અટકે નહીં સ્હેજે વલૂરવું.
સમજાવો સમજાવો કોક મને સમજાવો મારે એ કેમ કરી પૂરવું?
વાહ
સપનું વલૂરવામા વેદના ભીતર ઢબૂરી હોય છે.
.
હરીશ દાસાણી. said,
January 25, 2022 @ 4:32 PM
વેદનાની ધારદાર અભિવ્યકિતથી ઝુરાપો હાડોહાડ વ્યાપી જાય છે.
Chetan Shukla said,
January 27, 2022 @ 5:48 PM
ઝુરાપા વિશે એક સરસ ગેીત
દિલીપ ધોળકિયા said,
March 15, 2022 @ 7:16 AM
ખુબ જ સુંદર અભિવ્યક્તિ…
Karshan j Suvagiya said,
June 19, 2022 @ 9:57 AM
આને ઝુરાપાના ગીત કરતાં
‘ખરજવાનું ગીત’ કહેવું જોઈએ!