(પૃથ્વી ગોળ છે) – ખલીલ ધનતેજવી
કાચના મહેલોમાં કાગારોળ છે,
પથ્થરોની આંખ પણ તરબોળ છે.
કલ્પના સુંદર હતી, રૂડી હતી,
વાસ્તવિકતા કેટલી બેડોળ છે!
રાતદિ’ ચાલું છું ત્યાંનો ત્યાં જ છું,
મારું જીવન જાણે કે ચકડોળ છે!
મારા દિલમાં જીવતી ચિનગારીઓ,
એની આંખોમાં નર્યો વંટોળ છે.
કોણ એનું રૂપ બદલે, શી મજાલ?
આ તો મારા ગામની ભૂગોળ છે.
ઘાણીએ ફરતો બળદ અટકી જશે,
એને ના કહેશો કે પૃથ્વી ગોળ છે.
– ખલીલ ધનતેજવી
ગુજરાતી ગઝલના આકાશમાં દાયકાઓથી એકધારું મધ્યાહ્ને તપતો એક સૂર્ય ૮૫ વર્ષની વયે અચાનક આથમી ગયો… ગુજરાતી ગઝલના આકાશમાં અનેક સૂર્યો અને સિતારો આવતા રહેશે પણ ખલીલસાહેબની જગ્યા ભાગ્યે જ કોઈ લઈ શકશે. ઊંચી કદાવર કાઠી અને ઘોઘરા અવાજ સાથે એ જે અંદાજે-બયાંથી ગઝલ કહેતા, એ પણ હવે સ્મૃતિશેષ જ રહેશે. ભાગ્યે જ કોઈ મુશાયરો એવો થયો હશે, જેમાં ખલીલસાહેબને એમનો કાવ્યપાઠ પતી ગયા પછી દર્શકોના ‘વન્સમોર’ને માન આપીને પુનઃ માઇક ગ્રહણ કરવું ન પડ્યું હોય…
હર્ષદ દવે said,
April 8, 2021 @ 3:41 AM
સરસ ગઝલ.
વંદન સહ શ્રદ્ધાસુમન
Jay said,
April 8, 2021 @ 7:45 PM
જન્મ ખલીલ ઇસ્માઇલ મકરાણી
ડિસેમ્બર 12, 1935
ધનતેજ
મૃત્યુ 4 April 2021 (ઉંમર 85)
વડોદરા
અભ્યાસ ધોરણ ચાર…પણ ચારે દિશાઑ ગઝવી નાખી!
વિવેક said,
April 9, 2021 @ 2:32 AM
@ જય:
સુધારી લીધું છે.,.. ધ્યાન દોરવા બદલ આભાર…
Kajal kanjiya said,
April 11, 2021 @ 3:10 AM
સુંદર ગઝલ
સરાહનીય કાર્ય 👏👏
શ્રદ્ધાસુમન સહ શ્રદ્ધાંજલિ 🙏
ડો.મહેશ રાવલ said,
April 11, 2021 @ 1:16 PM
જનાબ ”ખલીલ”સાહેબની વિદાયથી ગુજરાતી ગઝલ ક્ષેત્ર ન પૂરી શકાય એવી,વહમી ખોટ પડી.એક એવો “ખલીલનો ખાલીપો” સર્જાયો છે,જેને ભરવામાં ખુદ સમય પણ હાંફી જવાનો !
કવિશ્રીને ગઝલપૂર્વક વંદન.
pragnajuvyas said,
April 11, 2021 @ 3:08 PM
એક મોટા ગજાના દિલાવર શાયરને આપણે ગુમાવ્યા.
એમના ખૂબ જાણીતા શેર મા
કોણ એનું રૂપ બદલે, શી મજાલ?
આ તો મારા ગામની ભૂગોળ છે.
ઘાણીએ ફરતો બળદ અટકી જશે,
એને ના કહેશો કે પૃથ્વી ગોળ છે.
વાહ્
Harihar Shukla said,
April 12, 2021 @ 7:21 AM
ઘાણીએ ફરતો બળદ અને ગોળ પૃથ્વી👌
Poonam said,
April 12, 2021 @ 11:10 AM
કલ્પના સુંદર હતી, રૂડી હતી,
વાસ્તવિકતા કેટલી બેડોળ છે!
– ખલીલ ધનતેજવી – uff ! ek se badhkar ek sher !