સરવાળે શૂન્ય છે – સાહિલ
આઠે પ્રહરનું રાવણું – સરવાળે શૂન્ય છે,
વિરાટ હો કે વામણું – સરવાળે શૂન્ય છે.
પાછળ છે સજ્જ લશ્કરો અંધારનાં અપાર
આ સૂર્ય જેવું તાપણું – સરવાળે શૂન્ય છે.
જીવન મળ્યું છે જીવવા તો મોજથી જીવો
થોડુંક હો કે હો ઘણું – સરવાળે શૂન્ય છે.
આ ઘરનો ઝળહળાટ છે ઊછીના તેજથી
થાતાં જ બંધ બારણું – સરવાળે શૂન્ય છે.
અજ્ઞાનમાં ડૂબું યા તરું જ્ઞાન-સાગરે
જગને ભણાવું યા ભણું – સરવાળે શૂન્ય છે.
પડછાયો મારો પણ કદી મારો નથી થયો
ખુદને ગણું કે અવગણું – સરવાળે શૂન્ય છે.
‘સાહિલ’ હું મર્મ આયખાનો જાણી શું કરું
સોહામણું – બિહામણું – સરવાળે શૂન્ય છે.
– સાહિલ
‘રાવણું’ એટલે ગરાસિયા અને ગામના આગેવાનોની મિજલસ; જ્ઞાતિજનોએ એકઠા મળીને તડાકા મારવા તે. પણ કવિ અહીં ગામની રેગ્યુલર પંચાતમંડળીની વાત નથી કરતા, એ તો આઠ પ્રહરના રાવણાંની વાત કરે છે. મતલબ ગામગપાટા કરવા જે ગામ અહીં ટોળે વળ્યું છે એ દિવસના આઠેય પ્રહરોનું બનેલું છે. દિવસ-રાત ભેગાં થઈનેય જીવન સરવાળે શૂન્ય જ છે એ વાત કવિએ કેવી અદભુત રીતે કહી છે! અને આ જ રીતે સરવાળે શૂન્ય હોવાની વાત કવિએ નાનાવિધ સંદર્ભોને સાંકળીને બાકીના બધા શેરોમાં પણ બેનમૂન રીતે કરી છે. પરિણામે સુવાંગ ગઝલ આસ્વાદ્ય બની છે.
Sandip Pujara said,
June 3, 2021 @ 1:15 AM
ખુબ સરસ ….
Vicky Trivedi said,
June 3, 2021 @ 2:36 AM
ખૂબ સરસ ગઝલ છે. 💐
Labhshankar Bharad said,
June 3, 2021 @ 4:08 AM
વાહ. ખૂબ સુંદર રચના. ધન્યવાદ. જય શ્રી કૃષ્ણ !
Labhshankar Bharad said,
June 3, 2021 @ 4:10 AM
વાહ. ખૂબ સુંદર. શ્રી કૃષ્ણ !
લલિત ત્રિવેદી said,
June 3, 2021 @ 4:23 AM
પ્રિય કવિ ની સુંદર ગઝલ
Pravin Shah said,
June 3, 2021 @ 5:10 AM
વાહ ! ખૂબ સરસ ગઝલ !
સરવાળે અમૂલ્ય ચ્હૅ !
pragnajuvyas said,
June 3, 2021 @ 10:00 AM
કવિશ્રી સાહિલની સુંદર ગઝલ
અજ્ઞાનમાં ડૂબું યા તરું જ્ઞાન-સાગરે
જગને ભણાવું યા ભણું – સરવાળે શૂન્ય છે
વાહ
ડૉ વિવેક દ્વારા સ રસ આસ્વાદ
Maheshchandra Naik said,
June 3, 2021 @ 2:15 PM
સરસ ગઝલ અને એટલો જ સ- રસ આસ્વાદ….
Rohit Kapadia said,
June 9, 2021 @ 9:40 AM
‘રાવણું’ શબ્દનો અર્થ ખબર ન હતો પણ જ્યારે
અર્થ ખબર પડી અને જે સંદર્ભમાં તેનો ઉપયોગ થયો છે.
આફરીન થઈ જવાય. ખૂબ જ સુંદર રચના. ધન્યવાદ