કોઈને કૈં પડી છે જ ક્યાં…. – મનોજ ખંડેરિયા
સાવ છાના પગે પાનખર ઘર કરી જાય છે, કોઈને કૈં પડી છે જ ક્યાં;
રાતદિ’ હરપળે પાન લીલાં ખરી જાય છે, કોઈને કૈં પડી છે જ ક્યાં.
ફાગણી મરમરો – શ્રાવણી ઝરમરો – કોઈને કૈં અસર ક્યાં કરે છે હવે,
આંખથી વિસ્મયો દૃશ્ય માફક સરી જાય છે, કોઈને કૈં પડી છે જ ક્યાં.
બાળપણની કથાની પરી ઊડી ગઈ, ને રમતની બધી કોડી વેરાઈ ગઈ,
આંખ સામે જ મોંઘી મૂડી પગ કરી જાય છે, કોઈને કૈં પડી છે જ ક્યાં.
કોણે પ્રગટાવિયો, વાટ કોણે મૂકી, તેલ કોણે પૂર્યું કોઈને ક્યાં ખબર,
કૈં સદીનો અખંડ દીપ આજે ઠરી જાય છે, કોઈને કૈં પડી છે જ ક્યાં.
આપણે ખોઈ ચૂક્યા છીએ આંસુઓ, ને ગુમાવી દીધી છે ભીની વેદના,
આપણી માલમતા સમય પરહરી જાય છે, કોઈને કૈં પડી છે જ ક્યાં.
ખળભળે પથ્થરો – ખડખડે બારીઓ – ને પડું રે પડું થઈ રહ્યાં બારણાં,
રોજ લાખો ઊધઈ ભીંતને ખોતરી જાય છે, કોઈને કૈં પડી છે જ ક્યાં.
– મનોજ ખંડેરિયા
કૌતુકવશતાથી મુગ્ધતા અને મુગ્ધતાથી સ્થૂળતા અને સ્થૂળતાથી જડતાની યાત્રા બનીને રહી જાય છે જિંદગી…..
Vineshchandra Chhotai said,
December 23, 2020 @ 2:36 AM
બહુજ ઊંડી સમજ,વેદના ના ચિત્કાર
મનોજ ભાઈ બે વંદન
Prahladbhai Prajapati said,
December 23, 2020 @ 5:26 AM
સુપેર્બ્
pragnajuvyas said,
December 23, 2020 @ 9:03 AM
ખળભળે પથ્થરો – ખડખડે બારીઓ –
ને પડું રે પડું થઈ રહ્યાં બારણાં,
રોજ લાખો ઊધઈ ભીંતને ખોતરી જાય છે,
કોઈને કૈં પડી છે જ ક્યાં.
મનોજ ખંડેરિયાનુ દુ:ખની ચીસ.પાડતુ ગીત
હર્ષદ દવે said,
December 23, 2020 @ 10:46 AM
સરસ ગઝલ. લાંબા રદીફ તો મનોજ ખંડેરિયા જેવા જુજ કવિઓ જ નિભાવી જાણે.
Maheshchandra Naik said,
December 25, 2020 @ 12:55 AM
કવિશ્રી મનોજ ખંડેરિયાને લાખ લાખ સલામ……
Parbatkumar said,
December 25, 2020 @ 10:44 AM
ગુજરાતી ગઝલમાં માઇલસ્ટોન રૂપ આ ગઝલ છે
આદરણીય મનોજ ખંડેરીયાની કલમને વંદન વંદન વંદન