શેર – કૈલાશ પંડિત
ભરેલો જામ મેં ઢોળી દીધો’તો એવા આશયથી,
હશે જો લાગણી એના દિલે, પાછો ભરી જાશે…
– કૈલાશ પંડિત
જાણે કેમ કેટલા વખતથી આ શેર મનમાં ગૂંજ્યા જ કરે છે….આ શેર સાથે બહુ જૂનો નાતો છે, ઘણીવાર આ શેરની ઝાટકણી કાઢતા અભિપ્રાય પણ વાંચ્યા છે, પણ આ શેરના તાર્કિક ગુણ-દોષ તેમજ તેમાં રહેલી મૂળ વાતની ફિલોસોફિકલ યથાર્થતાને બાજુ એ મૂકીને માત્ર શેરને જ માણીએ….મને હંમેશા આ શેર યાદ આવે તે સાથે દેવદાસ યાદ આવે – હૂબહૂ દેવદાસની મનોવૃત્તિ આલેખતો શેર છે આ ! પણ એવું બનતું નથી, લાગણી તો ખૂબ હતી પારોના હ્ર્દયે પણ તે પાછી ન આવી….ન જ આવે ! માત્ર લાગણીથી સંબંધ ક્યાં ટકે !!?? લાગણી સાથે સન્માન જોઈએ,કમિટમેન્ટ જોઈએ,લાગણીની કદર જોઈએ….સંબંધ બહુ જ નાજૂક તંતુ છે, અને અત્યંત મજબૂત તંતુ પણ છે…..ઈશ્વર બધા ગુના માફ કરતો હશે પણ કોઈ પ્રેમાળ દિલને ઠેસ પહોંચાડવાનો ગુનો કદી માફ નહીં કરતો હોય…..
હરિહર શુક્લ said,
September 8, 2020 @ 7:01 AM
વાહ મોજ 👌
pragnajuvyas said,
September 8, 2020 @ 1:55 PM
શબ્દો આંખ સામે આવતાં જ કાનમાં સ્વરો ગુંજવા લાગ્યા..
ચમન તુજને સુમન મારી જ માફક છેતરી જાશે,… કૈલાસ પંડિતજીની આ ગઝલ ગુજરાતી ગઝલનું સદાબહાર નજરાણું છે એમ કહીએ તો જરાય અતિશયોક્તિ નહીં ગણાય.શ્રી મનહર ઉધાસની પ્રથમ ગઝલ આ જ છે જેનાં માધ્યમે એમણે ગુજરાતી ગઝલ ગાયનમાં પદાર્પણ કર્યું.
તેમા આ
ભરેલો જામ મેં ઢોળી દીધો’તો એવા આશયથી,
હશે જો લાગણી એના દિલે, પાછો ભરી જાશે…
પંક્તિઓ અસરકારક છે.
તેમા ડૉ તીર્થેજીના આસ્વાદની આ વાત ‘માત્ર લાગણીથી સંબંધ ક્યાં ટકે !!?? લાગણી સાથે સન્માન જોઈએ,કમિટમેન્ટ જોઈએ,લાગણીની કદર જોઈએ….સંબંધ બહુ જ નાજૂક તંતુ છે, અને અત્યંત મજબૂત તંતુ પણ છે’ સટિક છે