છોડવું નથી….– ભગવતીકુમાર શર્મા
આખું ભલે હો ગામ અભણ છોડવું નથી,
શબ્દો વહેંચવાનું વલણ છોડવું નથી.
રેતીનું ભીનું ભીનું કળણ છોડવું નથી,
મૃગજળના ડરથી મારે આ રણ છોડવું નથી.
છેલ્લી ઘડીનું મારે નથી છોડવું શરણ,
આવ્યું છે હોંશથી તો મરણ છોડવું નથી.
કોને ખબર કે ક્યારે ફરી સૂર્ય ઉગશે?
સંધ્યાનું છેલ્લું ઝાંખું કિરણ છોડવું નથી.
તૃષ્ણા, મિલન-વિરહની હવે ક્યાં કશી રહી?
હા, અંત લગ આ નામ શરણ છોડવું નથી.
– ભગવતીકુમાર શર્મા
હરિહર શુક્લ said,
September 8, 2020 @ 7:03 AM
👌💐
Maheshchandra Naik said,
September 8, 2020 @ 10:44 PM
મુર્ધન્ય કવિ શ્રી ભગવતીકુમારની આ રચના ખુબ યાદગાર રચના અત્યન્ત વેદના સભર અને ભાવવાહી બની રહી …..