બહુ સારું થયું….- ‘ગની’ દહીંવાળા
જિંદગી પર વાદળું છાયું, બહુ સારું થયું,
ચિત્ર અંધારે ન દેખાયું, બહું સારું થયું.
હું તો આ મહેફિલ મહીં આવીને મૂંઝાયો હતો,
ત્યાં તમારું નામ બોલાયું, બહુ સારું થયું.
જિંદગી આખી પડ્યા આઘાત જેને ઝીલવા,
‘દિલ’ કહી એને નવાજાયું, બહુ સારું થયું.
હું તો મસ્તીમાં ન જાણે ક્યાંનો ક્યાં ચાલ્યો જતે,
ભાગ્ય સાથે લક્ષ્ય ભટકાયું, બહુ સારું થયું.
આપણી પાસે હતું જે ધન તે આંખોમાં હતું,
એ પ્રસંગોપાત વપરાયું, બહુ સારું થયું.
શું કહું દુનિયામાં મારે શી રીતે હસવું પડ્યું?
એ રુદન તમને ન સંભળાયું, બહુ સારું થયું.
શાપ થૈ ગૈ કંટકો માટે ચિરાયુની દુઆ,
પુષ્પથી ઝાઝું ન જીવાયું, બહુ સારું થયું.
વીતવાની જે હતી વીતી ભલે અમ પ્રેમ પર,
રૂપનું પણ પોત પરખાયું, બહુ સારું થયું.
જિંદગીભર મોતને માઠું નથી લાગ્યું ‘ગની’
છોને જીવાયું, ન જીવાયું, બહુ સારું થયું.
– ‘ગની’ દહીંવાળા
ગનીચાચાની ગઝલમાં જીવનનો પડઘો ન હોય તો જ નવાઈ !!! ” શું કહું દુનિયામાં મારે શી રીતે હસવું પડ્યું?…….” – આ એક જ શેર પર ફિદા થઇ જવાય….જયારે અહીં તો બધા જ શેર જોરદાર છે ! છેલ્લેથી બીજો શેર જુઓ !! મક્તો પણ અદભૂત…અખિલમ મધુરમ
Pravin Shah said,
August 17, 2020 @ 5:59 AM
વાહ ! વાહ !
તમૅ આ ગઝલ લાવ્યા – બહૂ સારુ થયુ.
pragnajuvyas said,
August 17, 2020 @ 9:05 AM
ઉત્તમ ગઝલકાર ગની સાહેબની ઉત્તમ ગઝલ…
માનવીય સંવેદનાઓને કેટલી સરસ રીતે સજાવી છે!
શું કહું દુનિયામાં મારે શી રીતે હસવું પડ્યું?
એ રુદન તમને ન સંભળાયું, બહુ સારું થયું.
એમની ગઝલોમાં ઘણા લોકોને એમના દિલના પડઘા પડતા સંભળાય
beena kanani said,
August 20, 2020 @ 3:58 AM
આ સુંદર દુનીયામાં 75 વર્ષ જીવી બહુ સારું થયું
રોતાને સાંભળી દોડી ગઈ અને આંસુ લુછી ને સ્મીત આપ્યું બહુ સારું થયું.
પણ કેટલાક રોનાર હાથે ન ચઢ્યા સારુ ન થયું.
જીંદગી ના કંટકોને કચડી નાખતા જેમને ન આવડ્યું તે સારું ન થયું.
અમ છતાં રોતાને છાના રાખવા દોડીશ તો સારું થયું .
રોતાઓ પોતાની જાતે જ છાના થઈ જઈ બીજાને સાચુ સ્મિત આપતા શીખી જશે સારું થશે,
અપરાજેીતા
લલિત ત્રિવેદી said,
August 21, 2020 @ 6:38 AM
ગની દહીંવાલા સાહેબની સરસ ગઝલ