સખી, આંખોનું આયખું તો કેટલું ?
મારા વ્હાલમને જોઈ રહું, એટલું
– તુષાર શુક્લ

(કો’ક વાર થાય) – હરીન્દ્ર દવે

August 13, 2020 at 12:30 AM by વિવેક · Filed under ગીત, હરીન્દ્ર દવે

કો’ક વાર થાય પોઢું ફૂલનાં હિંડોળે
કા’ન દોરી ખેંચીને તું ઝુલાવે
અમથી હું આંખ મીચું, કાન રહું માંડી
કે હાલરડું ગાવું તને ફાવે!

સ્હેજ જરા અટકો જો ઝોલો, તો ખોયાને
બે હાથે ઝાલી થાઉં બેઠો,
થાકીને કોઈ વાર મેલી જો દોરી
તને બેસવા દઉં ન લેશ હેઠો,
કંટાળી મારે મને ધબ્બા ને કાલીકાલી
વાણીથી છો ને ફોસલાવે…

અમનેય આવડે છે મરકલડાં આણતાં
ને અમનેયે ભાવે છે ગોરસ,
અમને એ ઓરતા કદંબડાળ બેસીએ કે
મંદિરમાં બની જઈએ આરસ
થીર આંખે બેસીએ ને ચંદન ને ધૂપ લઈ
હળવે હળવે તું પાસ આવે…

– હરીન્દ્ર દવે

Role-reversal કોને ન ગમે? કાનુડાને હિંચવવા આખી દુનિયા સદાની તૈયાર… પણ કવિને કોઈક વાર વિચાર આવે છે કે પોતે ફૂલના હિંડોળે સૂઈ જાય અને કાનુડો એને હિંચકે તો કેવું! પાછું અમથું સૂઈ રહેવાનું નથી… આ તો કવિ છે! એ ઈશ્વરની કસોતી કરતાંય અચકાય શાનો? ઈશ્વરને હાલરડું ગાતાં આવડે છે કે કેમ એ જાણવા એ અમથી અમથી આંખ મીંચીને કાન માંડે છે. વળી ઝોલો અટકવો ન જોઈએ એ બીજી શરત છે. હિંચકો જરાક અટક્યો નથી કે જે રીતે બાળકાનુડો યશોદાનું ઉપરાણું લેતો’તો એ જ રીતે કવિ પણ ખોયો ઝાલીને બેઠો થઈ જશે. થાકી જાય, કંટાળી જાય, ધબ્બા મારે કે કાલી-કાલી વાણીથી ફોસલાવવા કરે તોય કૃષ્ણ જેવા કૃષ્ણને પણ થાકીને બે પળેય દોરી મેલીને હેઠો બેસવા નહીં દેવાનું નક્કી જ છે. જે રીતે સ્મિતના મરકલડાં આણીને કાનાએ હોકુળને ઘેલું કર્યું હતું, એવાં મરકલડાં આણતાં કવિને પણ આવડે છે. કવિનેય ગોરસ ખાવાનાં ને કદંબડાળે બેસવાનાં ને મંદિરમાં કાનુડો ચંદન-ધૂપ લઈ પૂજવા આવે તો આરસ બનીને સ્થિર પ્રતીક્ષા કરવાના ઓરતા છે..

આવી કવિતા હોય તો સર્જનહારને પણ કવિને હિંડોળવાનું મન થઈ જાય એ નક્કી!

7 Comments »

  1. હરિહર શુક્લ said,

    August 13, 2020 @ 12:42 AM

    હરીન્દ્ર દવે નું ગીત એટલે પૂછવું જ શું?
    “માધવ ક્યાંય નથી મધુવનમાં”
    👌💐

  2. Kajal kanjiya said,

    August 13, 2020 @ 10:18 AM

    Wahhh

  3. pragnajuvyas said,

    August 13, 2020 @ 11:00 AM

    Yamini Vyas

    Wed, Aug 12, 9:28 PM (11 hours ago)

    to me

    અમથી હું આંખ મીચું, કાન રહું માંડી
    કે હાલરડું ગાવું તને ફાવે!
    અદ્ભુત અનુભૂતિ

  4. Kamlesh Solanki said,

    August 14, 2020 @ 12:50 AM

    વાહ ખુબ સરસ

  5. Chandrashekhar Pandya said,

    August 14, 2020 @ 6:36 AM

    અદભુત કલ્પન!

  6. Lata Hirani said,

    August 15, 2020 @ 6:32 AM

    કેવી રમ્ય કલ્પના !

  7. અનિલ શાહ પુના said,

    April 22, 2021 @ 1:46 AM

    તને ફાવે ને મનેય ફાવે,
    પ્રીતના હિંચકે ઝુલવુ કહે કોને ના ફાવે,

RSS feed for comments on this post · TrackBack URI

Leave a Comment