અનેક…… – અનિલ ચાવડા
ઘર તો હતાં અનેક ને ઝાંપા હતા અનેક,
પણ આશરાના આપણે ફાંફા હતા અનેક.
એકાદ ડગની દૂરી યે કાપી શકાઈ નૈં,
એકાદ ડગના માર્ગમાં ફાંટા હતા અનેક.
વર્ષો પછી મળ્યાં હતાં એ માર્ગમાં, અને-
દૃશ્યો અમારી આંખમાં ઝાંખાં હતાં અનેક.
ખીલાઓ ખૂબ માર્યા છે એ સ્પષ્ટ થાય છે
સંબંધની દીવાલમાં ટાંચા હતા અનેક.
આ જિંદગી વિશે જરા પૂછ્યું’તું મેં મને જ,
થોડાં સમર્થનો હતાં, વાંધા હતા અનેક.
ખોલીને એની કેદથી આવી શક્યો ન બ્હાર
સ્મરણોની બંધ શીશીને આંટા હતા અનેક.
બીમાર આંખને ગણી કરતા રહ્યા ઇલાજ,
જોયું નહીં કે સપનાંઓ માંદાં હતાં અનેક.
મૃત્યુ સિવાય શ્વાસને ના લાંગરી શક્યા,
જીવનની આ નદીને તો કાંઠા હતા અનેક.
એક દોરડે મદદ કરી કૂવાની ડોલને,
તેથી કૂવાના પથ્થરે આંકા હતા અનેક.
ચોર્યાસી લાખ બાદ ક્યાં નિશ્ચિત હતું કશુંય,
જન્મોની એક ગલી હતી, ટાંપા હતા અનેક.
– અનિલ ચાવડા
Vasant sheth said,
November 19, 2018 @ 9:36 AM
ર્હુદય સોંસરવી ઉતરી જાય તેવી રચના.
Anil Chavda said,
November 19, 2018 @ 11:13 PM
થોડાં સમર્થનો હતાં
ashok trivedi said,
November 22, 2018 @ 7:08 PM
anilbhai bahu j mast mast . maza avi gai gujarat samachar ane gujarati mid day ni colam mate saras gamta share mali gaya abhinandan
ashok trivedi said,
November 22, 2018 @ 7:14 PM
anilbhai bahuj maja avi gai dost. mast mast rachna. gujarat samachar ane gujarati mid day ni colam mate saras share mali gaya. abhinandan
Nehal said,
November 29, 2018 @ 6:10 AM
વાહ, અદ્દભૂત!
PALASH SHAH said,
April 12, 2020 @ 2:13 AM
બીમાર આંખને ગણી કરતા રહ્યા ઇલાજ,
જોયું નહીં કે સપનાંઓ માંદાં હતાં અનેક.
ખૂબ મજા આવી……