પુષ્પ પર ડાઘો પડે એ બીકથી,
જીવવાની જીદ્દ ઝાકળ ના કરે.
ચિનુ મોદી ‘ઈર્શાદ’

મળ્યાં – સુન્દરમ્

મળ્યાં વિરહના અનેક કપરાં દિનોની પછી
મહાજન સમૂહમાં કરત માર્ગ ધીરે ધીરે,
ઘડી ઘડી અનેક સંગ કરી ગોઠડી લ્હેરથી,
બધાનું પતવી પછી બહુ નિરાંતથી તે મળ્યાં.
ઘણો સમય તો ન કાંઈ જ વદ્યાં અને જ્યાં વદ્યાં
પૂછી ખબર અન્ય કોક તણી સાવ સાદી સીધી.
અને ખબર એ સુણી નહિ સુણી કરી બેઉ તે
અકંપ અણબોલ મૌન મહીં મૂક પાછાં સર્યાં,
ઘડી ઘડી ઉઠાવી નેણ નીરખ્યા કર્યું અન્યને.

-સુન્દરમ્

વિરહના કપરાં દિવસો વેઠ્યા બાદ મળેલા પ્રેમીજનોનું મિલન કેવું હોય? સુનામીના મોજાં જેવું? પણ સુન્દરમ્ ના કાવ્ય નાયક-નાયિકા એવા અનંગવેગથી ન જ મળે. અહીં તો મિલન પણ લોકોની વચ્ચે થાય છે અને બન્ને જણ “લ્હેર”થી વચ્ચે મળતા જતા લોકો સાથે ગોઠડી કરતાં-કરતાં નજીક આવે છે. એકબીજાને મળે છે તો ખરા પણ ‘બધાનું પતવીને’. પ્રદીર્ઘ વિયોગ જેવું જ લાંબું મૌન સેવ્યા પછી પણ હોઠેથી જે વાત સરે છે એ પોતાની નહીં, અન્યોની જ છે અને વળી બંનેના કાન તો એ દુન્યવી વ્યવહારની વાતો પાછા સાંભળતા જ નથી. અકંપ, અણબોલ અને મૌન એમ ત્રણ વિશેષણોને એક કતારમાં મૂકીને કવિએ મૂક સરવાની વાતને ત્રિગુણિત કરી દીધી છે. પ્રેમ એ કોઈ ઢંઢેરો પીટવાની ઘટના નથી, પ્રેમ તો છે એક અનુભૂતિ… એક સંવેદના… જ્યારે સર્વ ઈંદ્રિય સતેજ થઈ જાય છે ત્યારે વાચાને વહેવા શબ્દોના ખભાની જરૂર નથી રહેતી. ઘડી ઘડી – એમ પુનરાવર્તન કરવાથી એકબીજાને આંખો-આંખોથી ચાહવાની, જોવાની, સાંભળવાની ઘટનાને કવિએ બખૂબી શબ્દાંકિત કરી છે. અહીં સુન્દરમ્ નું જ અન્ય કાવ્ય ‘મેરે પિયા મૈં કછું નહીં જાનૂં,મૈં તો ચુપચુપ ચાહ રહી‘ યાદ આવ્યા વિના રહેતું નથી.

5 Comments »

  1. pragnajuvyas said,

    November 29, 2007 @ 10:05 am

    ખૂબ સુંદર
    ઘડી ઘડી ઉઠાવી નેણ નીરખ્યા કર્યું
    જાણે કહ્યું
    તું માનસ અમ મુકુલિત કરતી ઉજ્જવલ કો ધ્યુતિ અરુણા,
    તું જીવનના વ્રણ પર વરસત કોઈ અમીમય કરુણા.
    તું જીવનની જન્મ- ક્ષણોની ધાત્રી પ્રાણ-પ્રદીપા,
    તું કદમે કદમે પ્રજ્વલતી અગ્નિજ્યોત સજીવા.

  2. ભાવના શુક્લ said,

    November 29, 2007 @ 11:31 am

    અકંપ અણબોલ મૌન મહીં મૂક પાછાં સર્યાં,
    ઘડી ઘડી ઉઠાવી નેણ નીરખ્યા કર્યું અન્યને
    ………………………………………………..
    સુંદરમ્…સુંદરમ્….

  3. ધવલ said,

    November 29, 2007 @ 6:58 pm

    અકંપ અણબોલ મૌન મહીં મૂક પાછાં સર્યાં,
    ઘડી ઘડી ઉઠાવી નેણ નીરખ્યા કર્યું અન્યને.

    – બહુ ઉત્તમ વર્ણન…

  4. ઊર્મિ said,

    November 29, 2007 @ 9:34 pm

    વાહ… ખૂબ જ સુંદર… અને આસ્વાદ પણ મજાનો કરાવ્યો દોસ્ત!

  5. Salim Shahbaaz said,

    December 5, 2007 @ 1:44 am

    Bhavnagar.
    04.12.’07
    Dear Vivek,
    I always enjoy your poems (or Gazals) on Bhavnagari Group site. I am happy to see Laystaro. Congrats to you and to all on the foundation anniversary.
    = S. Shahbaaz

RSS feed for comments on this post · TrackBack URI

Leave a Comment