તો જુઓ ! – ભગવતીકુમાર શર્મા
કેવી હઠે ચઢી છે આ શરણાઈ તો જુઓ !
ડૂસકાંની સાથે એની હરીફાઈ તો જુઓ !
આવ્યું-ગયું ન કોઈ તમારાં સ્મરણ સિવાય;
કેવી સભર બની છે આ તનહાઈ તો જુઓ !
અંધાર લીલોછમ અને ટહુકાના આગિયા
ઝળહળ સુગંધ વેરતી અમરાઈ તો જુઓ !
પડછાયાની તો કેવી કરે છે એ કાપકૂપ !
સૂરજની મારા પરની અદેખાઈ તો જુઓ !
બેમત પ્રવર્તે એને વિશે, હું તો છું જ છું !
ઈશ્વર ઉપરની મારી આ સરસાઈ તો જુઓ !
-ભગવતીકુમાર શર્મા
Sharad Shah said,
August 26, 2012 @ 10:21 AM
એક પૅરોડી
કેવી હઠે ચઢી છે આ લુગાઈતો જુઓ,
ડુસકાંની સાથે એની અકડાઈ તો જુઓ.
આવ્યું ગયું ન કોઈ એમના સ્મરણ સિવાય
કેવી દુર્ભર બની છે આ સગાઈ તો જુઓ.
સંસાર લીલોછમ અને ટાબરીયાંના રાગડા
પળપળ અગન વેરતી અંગડાઈ તો જુઓ.
ખરચામાં તો કેવી કરે છે એ કાપકૂપ
કરમની કેવી છે આ કઠણાઈ તો જુઓ.
બેમત પ્રવર્તે એને વિશે, તું તો છું જ છું,
નશ્વર ઉપરની મારી આ નબળાઈ તો જુઓ.
(શરદ)
perpoto said,
August 26, 2012 @ 11:37 AM
કવિનો પત્નિ વિયોગ ….
તેમની બીજી પન્ક્તી જુઓ
મારે બારણૅ ટકોરાનુ ફાટયુ તોફાન…..
Maheshchandra Naik said,
August 26, 2012 @ 12:55 PM
ઈશ્વર ઉપરની મારી આ સરસાઈ તો જુઓ ,
કવિશ્રીએ વાસ્તવિકતાની વાત કરી છે, ઈશ્વરને તો એમણે જોયો નથી પરંતુ પોતાની હયાતીની વાત નિખાલસપુર્ણ કરી છે., પત્નિવિયોગની વાત પણ બીજી પક્તિઓમા હદયભાવ વ્યક્તકરે છે…. અદભુત રજુઆત……………..
J k nanavati said,
August 26, 2012 @ 1:22 PM
છેલ્લો શેર્……..શેર સમો
RAKESH SHAH said,
August 26, 2012 @ 10:48 PM
અદભુત
"Sahaj" said,
August 27, 2012 @ 2:24 AM
આફ્રેીન !
વિવેક said,
August 29, 2012 @ 8:52 AM
સુંદર ગઝલ..
Nivarozin Rajkumar said,
September 2, 2012 @ 10:59 AM
પડછાયાની તો કેવી કરે છે એ કાપકૂપ !
સૂરજની મારા પરની અદેખાઈ તો જુઓ !
બહુ સરસ્………સમય કાળ્….બધુ બદલી શકે છે…