પગ પર ઊભાં રહીને જુએ છે બધાં મને
જાણે કે પગ મને જ ફક્ત ચાલવા મળ્યા
ભરત વિંઝુડા

જળમાં લખવાં -હરિકૃષ્ણ પાઠક

ઊણાં-અધૂરાં મેલી કામ,
ભાઈ મારે જળમાં લખવાં નામ.
ભાઈ મારે જળમાં લખવાં નામ.

આગમની એંધાણી મળે ન તોયે
રાખવા દોર ને દમામ,
ઝંખવાતી નજરુંના દીવડે
આંજવા તેજને તમામ.
ભાઈ મારે જળમાં લખવાં નામ.

ઊબડ-ખાબડ પંથ પડ્યા છે તોયે
ભીડવી ભવની હામ,
રથ અરથના અડધે તૂટે
ઠરવા નહીં કોઈ ઠામ.

તોયે મારે જળમાં લખવાં નામ,
ભાઈ મારે જળમાં લખવાં નામ.

-હરિકૃષ્ણ પાઠક (માર્ચ 1974)

આપણું જીવવું એટલે જાણે કે જળમાં નામ લખવા સમાન…  જળમાં નામ લખવાની વાત સાથે જ મને ઓજસ પાલનપુરીનો એક શેર યાદ આવે છે: મારી હસ્તી મારી પાછળ એ રીતે વીસરાઈ ગઈ, આંગળી જળમાંથી નીકળીને જગા પુરાઈ ગઈ…

8 Comments »

  1. deepak trivedi said,

    July 30, 2010 @ 11:51 pm

    ઊબડ-ખાબડ પંથ પડ્યા છે તોયે
    ભીડવી ભવની હામ,
    રથ અરથના અડધે તૂટે
    ઠરવા નહીં કોઈ ઠામ.

    તોયે મારે જળમાં લખવાં નામ,
    ભાઈ મારે જળમાં લખવાં નામ.

    -હરિકૃષ્ણ પાઠક (માર્ચ 1974)
    ખુબ મજ આવેી ..આનન્દ થયો…

  2. mahesh dalal said,

    July 31, 2010 @ 12:12 am

    સાસિ ભાશા મા … ઘનુ કહિ જાય … સરસ

  3. વિવેક said,

    July 31, 2010 @ 12:40 am

    સુંદર રચના…

  4. DR Bharat Makwana said,

    July 31, 2010 @ 4:08 am

    જળમાં લખવાં નામ…એકદમ શીર્ષક ને અનુરૂપ રચના..

  5. Bharat Trivedi said,

    July 31, 2010 @ 7:58 am

    સરસ ગીત. અંગ્રેજીમાં કહેવત છેઃ This too shall pass. સારું કે નરસું બધું જ સમયના વહેણ સાથે તણાઈ જતું કે તણાઈ જવાનું હોય છે- આ બધી કવિતા થાય છે તે પણ ! પરન્તુ કવિતા થતી અટકી જવાની ખરી? એવું શા માટે ? સાચી કવિતા પ્રશ્ન પર જ અટકી જાય. પ્રયેક કામનો એક આગવો જ મહિમા છે તે વિચારવાનું કામ આપણું છે.

    -ભરત ત્રિવેદી

  6. Chinu Modi said,

    July 31, 2010 @ 9:23 am

    ગીત એ વાયુમાંથી શિલ્પ કોતરવા જેવી અઘરી કળા છે. બૈરક લેહ્કા વગર લખયેલું આ ગીત આપણી આધુનિક કવિતાનું નોંધપાત્ર ગીત છે. મણિલાલ દેસાઈ, રાવજી પટેલ, અનિલ જોશી, રમેશ પારેખ, માધવ રામાનુજ, વિનોદ જોશીનાં એકાદ એકાદ અપૂર્વ ગીત સાથે આ બેસી શકે તેમ છે. જળમાં લખવા નામ એટલે કવિતા લખી નીચે સહી કરવી. હી, હી,હી,

    -ચિનુ મોદી

  7. Girish Parikh said,

    July 31, 2010 @ 11:04 am

    લયસ્તરો પર ‘ચિનુસ્તરો’ વાંચવાનો આનંદ પણ અનોખો છે !
    – – ગિરીશ પરીખ મોડેસ્ટો કેલિફોર્નિયા

  8. sudhir patel said,

    July 31, 2010 @ 11:41 am

    જિંદગીના ગહન ભાવોને સુંદર લયમાં રજૂ કરતું અનોખું ગીત!
    ચિનુભાઈની વાત સાથે સંપૂર્ણ સહમત!
    સુધીર પટેલ.

RSS feed for comments on this post · TrackBack URI

Leave a Comment