ખબર છે તને ? – મુકુલ ચોક્સી
(ખાસ લયસ્તરો માટે મુકુલ ચોક્સીએ સ્વહસ્તે લખી આપેલી અપ્રગટ ગઝલ)
હૃદયને રસ્તે હું જન્મ્યો હતો, ખબર છે તને ?
રુદનને બદલે હું મલક્યો હતો, ખબર છે તને ?
હું તારી લટને કિનારે જ આવીને અટક્યો
ક્ષિતિજના ઢાળથી લપસ્યો હતો, ખબર છે તને ?
બિચારા ઈવ કે આદમને કંઈ ખબર ન્હોતી
પ્રણય મેં એમને શીખવ્યો હતો, ખબર છે તને ?
એ વર્ષોમાં તો રચાઈ નહોતી ભાષા છતાં,
હું બૂમ પાડીને બોલ્યો હતો, ખબર છે તને ?
સમયની શોધ થઈ તેની આગલી સાંજે
મેં ઇન્તજારને શોધ્યો હતો, ખબર છે તને ?
-મુકુલ ચોક્સી
આ ગઝલના છેલ્લા બે શે’ર મુક્તક તરીકે ખાસ્સા વખણાયા છે પરંતુ કદાચ એ મુક્તક લખતી વેળાએ કવિએ ભીતર કોઈ ખાલીપો વેઠ્યો હશે તેના ફળસ્વરૂપે આજે એ મુક્તકના પાયા ઉપર વરસો પછી આખી ગઝલની ઈમારત ચણાય ગઈ. ‘લયસ્તરો’ માટે આ અપ્રગટ તાજ્જી ગઝલ સ્વહસ્તે લખી આપવા બદલ મુકુલભાઈનો ખૂબ ખૂબ આભાર…
Jayshree said,
September 15, 2007 @ 2:36 AM
અરે…!! આ તો ફૂટી ગયેલું પેપર છે..
મેં મુકુલભાઇ પાસેથી જ આ રચના સાંભળી હતી…
બિચારા ઈવ કે આદમને કંઈ ખબર ન્હોતી
પ્રણય મેં એમને શીખવ્યો હતો, ખબર છે તને ?
સમયની શોધ થઈ તેની આગલી સાંજે
મેં ઇન્તજારને શોધ્યો હતો, ખબર છે તને ?
આ બંને શેર ખૂબ ગમ્યા…!!
અને એ ક્ષણ મને માણવા મળી, એ માટે તો મુકુલભાઇનો, અને સૌ મિત્રોનો આભાર માનું એટલો ઓછો છે.
વિવેક said,
September 15, 2007 @ 3:21 AM
ફૂટી ગયેલું પેપર? હા… આ મહિનાના પહેલા અઠવાડિયે જયશ્રી સુરત આવી હતી ત્યારે રવિવારની એક સાંજે હૉટલ તાજમાં મુકુલ ચોક્સી, મેહુલ સુરતી, હું, જયશ્રી અને મારો મિત્ર મનીષ ચેવલી સપરિવાર બેઠા હતા ત્યારે મુકુલભાઈએ આ ગઝલ સંભળાવી હતી અને મેં લયસ્તરો માટે માંગી લીધી હતી. એ જ પ્રસંગે ‘તાજ’ના ગાયકે મુકુલ ચોક્સીએ વર્ષો પહેલાં “ઓન-ડિમાન્ડ” ઈન્સ્ટન્ટ લખી આપેલી એક હિંદી ગઝલ પણ સંભળાવી હતી, જેના શેર મુકુલભાઈ પોતે પણ ભૂલી ગયા હતા… આવતા શનિવારે હસ્તપ્રત શૃંખલામાં શક્ય થાય તો એ ગઝલ પણ મૂકીશ…
Pinki said,
September 15, 2007 @ 4:52 AM
અંચઇ !! ફુટી ગયું પેપર !!
મારા માટે તો નવુંનકોર જ છે.
અને ખૂબ જ સરસ………….
હૃદયને રસ્તે હું જન્મ્યો હતો, ખબર છે તને ?
રુદનને બદલે હું મલક્યો હતો, ખબર છે તને ?
છેલ્લા બે શેર તો બહુ જ સરસ છે પણ
પહેલો શેર – ઇમારતની ગુંબજ પણ શાનદાર જ છે ………
દૂરથી પણ દેખાય એવી………….
ધવલ said,
September 15, 2007 @ 6:06 PM
છેલ્લો શેર તો અદભૂત છે જ. ભાષા પહેલા બોલવાની અને સમય પહેલા ઈંતેજારની કલપના જ ઊંચી છે!
બિચારા ઈવ કે આદમને કંઈ ખબર ન્હોતી
પ્રણય મેં એમને શીખવ્યો હતો, ખબર છે તને ?
એ ખુમારી પણ ગમી ગઈ !
Bhavna Shukla said,
September 16, 2007 @ 6:43 PM
સમયની શોધ થઈ તેની આગલી સાંજે
મેં ઇન્તજારને શોધ્યો હતો, ખબર છે તને ?
…………………………………………………
અધધધ………… કેટલી નજાકતથી સમયની સાડાબારી સાંખવાની…
હુ કે તમે બેખબર રહી શકીએ આ જોહુકમીથી?
Urmi said,
September 21, 2007 @ 7:51 PM
ઓહ ગોડ…આટલી મસ્ત ગઝલ અને મેં આટલી મોડી જોઈ?
જે જાતે લખીને ભૂલી પણ જાય એવા કવિને સો સો સલામ…
આખી ગઝલમાંથી પસંદગીના માત્ર ૨-૩ શેર કાઢવા મારે માટે શક્ય જ નથી!
)
(આખી ગઝલ ફરી અહીં પેસ્ટ કરી દઉં?
અને આ “ખબર છે તને?” રદીફ તો મને બહુ જ ગમ્યો…!
વિવેક-જયશ્રીની વાત સાંભળીને તો હું ય ‘તાજ’માં ફરી આવી…
pragnaju said,
September 24, 2007 @ 9:32 AM
દાદ આપવા યોગ્ય ગઝલને દાદ તો ઘણી મળી.બધા શેરો સારા હોય તો ઊર્મિની જેમ હું પેસ્ટ કરવાની લાગણી દબાવવા માંગતી નથી.
હૃદયને રસ્તે હું જન્મ્યો હતો, ખબર છે તને ? રુદનને બદલે હું મલક્યો હતો, ખબર છે તને ?
હું તારી લટને કિનારે જ આવીને અટક્યો ક્ષિતિજના ઢાળથી લપસ્યો હતો, ખબર છે તને ?
બિચારા ઈવ કે આદમને કંઈ ખબર ન્હોતી પ્રણય મેં એમને શીખવ્યો હતો, ખબર છે તને ?
એ વર્ષોમાં તો રચાઈ નહોતી ભાષા છતાં, હું બૂમ પાડીને બોલ્યો હતો, ખબર છે તને ?
સમયની શોધ થઈ તેની આગલી સાંજે મેં ઇન્તજારને શોધ્યો હતો, ખબર છે તને ?
તાજના કે વગરતાજનાં ગાયકે ગાયલી ગઝલ બ્લોગમાં મૂકો તો ક્લીક કર્યુને કાનને રસ્તે માણીએ
શબ્દો છે શ્વાસ મારા · Let us wet ourselves once again… said,
October 6, 2007 @ 2:24 AM
[…] ‘પણ ત્યાં કેવી રીતે?’ નો પ્રશ્ન જેવો ઊગ્યો એવો જ આથમી પણ ગયો. ‘મહેફિલે-ખાસ’ વિભાગમાં મુકુલ ચોક્સીની ‘લયસ્તરો‘ પર સૌપ્રથમવાર પ્રગટ થયેલી અક્ષુણ્ણ ગઝલની સાથે મારી વેબ-સાઈટ પર પ્રગટ થયેલું આ ગીત… મારી બંને વેબ-સાઈટના કોઈ રસિક મિત્રે અમારા બંનેની કૃતિઓ ‘મુંબઈ સમાચાર’ને મોકલી આપી હશે… ‘સાભાર-પરત’ના કાગળિયાઓના વરસાદની વચ્ચે સાવ આમ અચાનક કોઈ કવિતા જ્યાં કદી મોકલી નથી, કે મોકલવાનું વિચાર્યું નથી ત્યાં વીજળીની માફક ચમકી આવે તો કેવો આનંદનો પ્રકાશ છવાઈ જાય ! બસ, એ ક્ષણાર્ધના અજવાળામાં આપ સૌનો પણ ફોટો પાડી લેવાની ઈચ્છા થઈ એટલે અગાઉથી જ આભાર માની લઈને આ આજની પૉસ્ટ… […]
Angel Dholakia said,
May 13, 2009 @ 1:52 AM
આ તો મેં પણ વાચેલિ છે.ખબર છે તને?
ખુબ સરસ.