(કારણ મને ગમે છે) – અમૃત ઘાયલ
કાજળભર્યા નયનનાં કામણ મને ગમે છે,
કારણ નહીં જ આપું કારણ મને ગમે છે.
લજ્જા થકી નમેલી પાંપણ મને ગમે છે,
ભાવે છે ભાર મનને, ભારણ મને ગમે છે.
જીવન અને મરણની હર ક્ષણ મને ગમે છે,
એ ઝેર હોય અથવા મારણ, મને ગમે છે.
ખોટી તો ખોટી હૈયાધારણ મને ગમે છે,
જળ હોય ઝાંઝવાનાં તો પણ મને ગમે છે.
હસવું સદાય હસવું, દુઃખમાં અચૂક હસવું,
દીવાનગીતણું આ ડહાપણ મને ગમે છે.
આવી ગયાં છે આંસુ, લૂછો નહીં ભલા થઈ,
આ બારેમાસ લીલાં તોરણ મને ગમે છે.
લાવે છે યાદ ફૂલો છાબો ભરી ભરીને,
છે ખૂબ મહોબતીલી માલણ, મને ગમે છે.
દુઃખ શું હવે હું પાછી દુનિયાય પણ નહીં દઉં,
એ પણ મને ગમે છે, આ પણ મને ગમે છે.
હું એટલે તો એને વેંઢારતો રહું છું,
સોગંદ જિંદગીના! વળગણ મને ગમે છે.
ભેટ્યો છું મોતને પણ કૈં વાર જિંદગીમાં!
આ ખોળિયાની જેમ જ ખાપણ મને ગમે છે!
‘ઘાયલ’ મને મુબારક આ ઊર્મિકાવ્ય મારાં,
મેં રોઈને ભર્યાં છે, એ રણ મને ગમે છે.
– અમૃત ઘાયલ
હજારથી વધુ કવિના ૪૭૦૦થી વધુ કાવ્યો જે વેબસાઇટ ઉપર હાજર હોય, એ વેબસાઇટ ઉપર સો ટચના સોના જેવી આટલી વિખ્યાત ગઝલ, જેને ગાઈ-ગાઈને ગુજરાતીઓએ હૃદયસ્થ કરી નાંખી છે, એ આજદિન સુધી કયા કારણોસર મૂકવાની રહી ગઈ એમ અગર આપ અમને પૂછશો તો અમે કહીશું કે કારણ નહીં જ આપું, કારણ અમને ગમે છે…
Prahladbhai Prajapati said,
July 30, 2020 @ 9:41 AM
સુપેર્બ
pragnajuvyas said,
July 30, 2020 @ 11:49 AM
આપણને કોઇની આંખ ગમે છે, કારણ કે એ ગમે છે બસ !
અફલાતુન!
પ્રણયમાં સૌથી વધારે મહત્ત્વ આંખનું છે. પહેલા આંખ મળે પછી જુગ્યુલર વેઇન દ્વારા દિલને ગમે…
યાદ આવે તેમની જ વાત
આંખનું ઊંડાણ અગાધ છે. આગ સાથે ખેલાય,
આંખ સાથે ન ખેલાય., ખોવાઇ જવાય.
નયન સાથે એને રમવા ન મેલો,
હૃદય સાવ બાળક છે, ખોવાઇ જાશે -અમૃત ‘ઘાયલ’
તમારી આંખે શરાબ છલકે,
અમારી આંખે ખુમાર આવે ! -‘શયદા’
‘ મીર’ ઉન નીમબાઝ આંખોમેં,
સારી મસ્તી શરાબ કી સી હૈ
બેસાખ્તા નિગાહે જો આપસમેં મિલ ગઇ,
ક્યા મૂંહપે ઉસને રખ લીયે, આંખે ચુરાકે -હાથ !-નિઝામ રામપુરી
માત્ર આંસુઓ જ જોયા છે તમે,
આંખ એની વાંચવા જેવી હતી. -નિનાદ અધ્યારૂ
એક જંગલ હૈ તેરી આંખમેં,
મૈં જહાં રાહ ભૂલ જાતા હૂં -દુષ્યંતકુમાર
ketankumar said,
August 1, 2020 @ 5:59 AM
ખુબ સુન્દર રચના ઘાયલ સાહેબની
Anil Shah.Pune said,
August 26, 2020 @ 11:44 PM
કાજલ કાળા નયનો માં નાખેલાં,
કામણગારુ બંનેનું મિલન,
મ્હેક મહેંદીની, હાથની હથેળીમાં,
એમાં મારું હસ્તધૂનન,
ગાલ ગુલાબી તડકો તાપી,
એમાં આ પરસેવા નું ચુંબન,
જામેલી તારી કસાયેલી કમર,
એમાં નજરો મારી તિક્ષણ,
જીવતેજીવ મારું અનિલ,
થઈ ગયું મરણ…..
Narendra H Shah said,
November 26, 2021 @ 9:56 AM
હજારથી વધુ કવિના ૪૭૦૦થી વધુ કાવ્યો જે વેબસાઇટ ઉપર હાજર હોય, એ વેબસાઇટ ઉપર સો ટચના સોના જેવી આટલી વિખ્યાત ગઝલ, જેને ગાઈ-ગાઈને ગુજરાતીઓએ હૃદયસ્થ કરી નાંખી છે, એ આજદિન સુધી કયા કારણોસર મૂકવાની રહી ગઈ એમ અગર આપ અમને પૂછશો તો અમે કહીશું કે કારણ નહીં જ આપું, કારણ અમને ગમે છે…
અફલાતૂન excuse…. 🙏🙏🙏…. ઘાયલ સાહેબને હજારો પ્રણામ 🙏🙏🙏🙏🙏
વિવેક said,
November 27, 2021 @ 12:15 AM
આભાર…