બધું ત્યાગી દઈને જાતને પણ ખોઈ દેવાનું,
સમંદરને કદાચિત્ આ નદી સમજાય તો સમજાય.
વિવેક મનહર ટેલર

ઇસ્ત્રી કરતી સ્રીનું ગીત – નરેશ સોલંકી

ડુચ્ચો વળેલ આખુ આભ તારૂ શર્ટ હું તો સૂરજથી ભાંગુ છું સળ
તને પ્હેરાવું ઝળહળતી પળ

ઝાકળ છાંટુ ને વળી અત્તર છાંટુ છું અને
હું પણ છંટાઉ ધીરે ધીરે
તારા ટી-શર્ટની હોડીમાં બેસીને હું
ફરતી રહું છું તીરે તીરે

ઝભ્ભાનો મખમલી રેશમયો સ્પર્શ મારા રૂંવાડે વહે ખળખળ

તારામાં મારું પ્હેરાઈ જવું એજ
મારા હોવાનો અર્થ એક સાચો
સંકેલું, વાળું ને ધોઉં રોજ સગપણને
એકે ન તંત રહે કાચો

ફૂલ ટુ ફટાક બધા ભાંગેલા સળ અને કપડાં તો કડકડતો કાગળ
તને પ્હેરાવું ઝળહળતી પળ

– નરેશ સોલંકી

કેવું અદભુત અને અનૂઠું ગીત ! વાદળોના અનિયમિત આકાર અને ગોઠવણથી આખું આકાશ જાણે ડૂચો વાળેલ કપડું બની ગયું છે ને એના પર સૂરજની અસ્ત્રી ફેરવવાની ! અસ્ત્રી કરવા માટે આપણે કપડાં પર પાણી છાંટીએ છીએ. અહીં કાવ્યનાયિકા ઝાકળ અને અત્તર છાંટે છે ત્યાં સુધી તો ઠીક પણ પોતે પણ ધીરે-ધીરે છંટાઈ રહી છે એ અનુભૂતિ ગીતને સર્વકાલીન શ્રેષ્ઠ ગીતની હરોળમાં બેસાડે છે. બીજા બંધમાં પણ એ જ રીતે ‘તારામાં મારું પહેરાઈ જવું’નું કલ્પન હોવાપણાંનો સાચો અર્થ ઈંગિત કરે છે.

8 Comments »

  1. નિનાદ અધ્યારુ said,

    February 9, 2017 @ 3:07 am

    ફૂલ ટુ ફટાક ગીત ….!!

    અભિનંદન નરેશ !
    વિવેકભાઈ સુંદર ગીત પીરસ્યું …

  2. Nehal said,

    February 9, 2017 @ 3:43 am

    Beautiful!

  3. Rakesh Thakkar, Vapi said,

    February 9, 2017 @ 3:57 am

    સુંદર કલ્પના, સુંદર ગીત !
    તારામાં મારું પ્હેરાઈ જવું એજ
    મારા હોવાનો અર્થ એક સાચો

  4. Naynesh A Tarasaria said,

    February 9, 2017 @ 7:44 am

    અદ્ભુત કલ્પન

  5. Naresh solanki said,

    February 9, 2017 @ 10:10 am

    આભાર વિવેકભાઈ અને લયસ્તરો

  6. KETAN YAJNIK said,

    February 10, 2017 @ 12:31 am

    આભાર વિવેકભાઈ અને લયસ્તર

  7. Bhumi said,

    February 10, 2017 @ 1:50 am

    ડુચ્ચો વળેલ આખુ આભ તારૂ શર્ટ હું તો સૂરજથી ભાંગુ છું સળ
    તને પ્હેરાવું ઝળહળતી પળ..

    sweet n beautiful poem 🙂

  8. લલિત ત્રિવેદી said,

    February 21, 2017 @ 5:22 am

    સુંદર ગીત
    વાહ

RSS feed for comments on this post · TrackBack URI

Leave a Comment