શું કરું! – અમૃત ઘાયલ
શુષ્ક છું, બટકું નહીં તો શું કરું !
અધવચે અટકું નહીં તો શું કરું !
રાફડા કોળ્યા છે રજના પાંપણે,
પાંપણો ઝટકું નહી તો શું કરું !
ક્યાં સુઘી હોઠોમાં ભીંસાતો રહું ?
શબ્દ છું, છટકું નહીં તો શું કરું !
‘કૈંક ખૂટે છે’ – નો ખટકો છું સ્વયં,
હું મને ખટકું નહીં તો શું કરું ?
બેસવા દે છે ન બેચેની કશે,
આમ હું ભટકું નહીં તો શું કરું !
જીવ અદ્ધર, શ્વાસ પણ અદ્ધર હવે,
લાશ છું, લટકું નહીં તો શું કરું !
ઊંચક્યું જાતું નથી ‘ઘાયલ’ જરી,
શીશ જો પટકું નહીં તો શું કરું !
– અમૃત ઘાયલ
‘કૈંક ખૂટે છે’ – નો ખટકો છું સ્વયં……. – એવું લાગ્યું કે જાણે શાયર મારા દિલમાં ઝાંકી શકે છે !!!
pragnajuvyas said,
March 30, 2020 @ 11:37 AM
શું કરું ! ગઝલના બાદશાહ અમૃત “ઘાયલ”ના બધાજ શેર લાજવાબ છે.
મુલાયમ ભાવોની સરલ અને અસરકારક અભિવ્યક્તિ એમની ગઝલની જાણીતી વિશેષતા છે. જીવન પરત્વેનો સ્વસ્થ અભિગમ એમાં જણાય છે. તેમના શબ્દોમા “ જીવન જેવું જીવું છું, એવું કાગળ પર ઉતારું છું; પછી થોડું ઘણું એને મઠારું છું.
‘કૈંક ખૂટે છે’ – નો ખટકો છું સ્વયં,
હું મને ખટકું નહીં તો શું કરું ?
આફ્રીન
યાદ આવે કુંતલની ગઝલ
વસહરા માફક તપતા રણને સાચવીને શું કરું ?
છળ છે જે, એ મૃગજળને સાચવીને શું કરું ?
જ્યાં નથી સંભાવના વસવાટની કંઈ પણ હવે,
એવા ઉજ્જડ શા નગરને સાચવીને શું કરું ?
ભીડમાં પણ જ્યાં સદા ખાલીપો ભીંસાતો રહ્યો,
સૂની એ ભરચક ડગરને સાચવીને શું કરું ?
ટોળાની પાછળ જ જે ચાલ્યા કરે, ઘેટાં બની,
મૂર્ખ એવા બે ચરણને સાચવીને શું કરું?
સમજે નઈ જે માણસાઈ, પૂજા પથ્થરની કરે,
અંધ એવા આ ધરમને સાચવીને શું કરું ?
માછલી છું એક ખારા પાણીમાં વસતી હું, તો
મીઠા પાણીની તરસ સાચવીને શું કરું?
એક’દી બાવળનાં કાંટે ફૂટશે રાતી કળી,
રોજ રાતે એ ભરમને સાચવીને શું કરું ?
Prahladbhai Prajapati said,
March 31, 2020 @ 7:56 AM
સુપેર્બ્
PALASH SHAH said,
April 11, 2020 @ 6:37 AM
સુન્દર રચના