હું તને સમજી રહ્યો છું;
આયનો ચૂમી રહ્યો છું !
શૈલ પાલનપુરી

લયસ્તરો બ્લોગનું આ નવું સ્વરૂપ છે. આ બ્લોગને  વધારે સારી રીતે માણી શકો એ માટે આ નિર્દેશિકા જોઈ જવાનું ચૂકશો નહીં.

Archive for અઝીઝ ટંકારવી

અઝીઝ ટંકારવી શ્રેણીમાંના બધા પોસ્ટ (કક્કાવાર), સંપૂર્ણ પોસ્ટ માટે ક્લીક કરો.




વરસો પછી – અઝીઝ ટંકારવી

બારણે દસ્તક થયા વરસો પછી,
ને સ્મરણ કૈં સળવળ્યાં વરસો પછી.

એમને ભૂલા પડ્યા ના કહી શકો,
જે બધા પાછા ફર્યા વરસો પછી.

જેમને શોધ્યા કર્યા વરસો સુધી,
એ જ ઉંબર પર મળ્યાં વરસો પછી.

આમ તો પથ્થર હતાં ને તે છતાં,
મીણ થઈને પીગળ્યાં વરસો પછી.

બે’ક ખેતરવા જ તો છેટુ હતું,
તે છતાં આજે મળ્યાં વરસો પછી.

લે ‘અઝીઝ’ સુધરી ગયું તારું મરણ,
દુશ્મનો ટોળે વળ્યા વરસો પછી.

– અઝીઝ ટંકારવી

પરંપરાની જમીન પર વિકસેલ આધુનિક્તાનું ગઝલપુષ્પ. ગઝલને સહેજ પણ અઘરી બનાવ્યા વિના વાંચતવેંત દિલને સ્પર્શી જાય એવી વાત કઈ રીતે કહી શકાય એ સમજવા માટેનું આ સરસ દૃષ્ટાંત ગણી શકાય. દસ્તક શબ્દમાંથી મુસ્લિમ જબાનની બૂ વર્તાય, એ સિવાય આખી ગઝલ આશિખાનખ મનનીય. બીજા શેરમાં ‘સુબહ કા ભૂલા શામ કો ઘર આ જાયે તો ઉસે ભૂલા નહીં કહેતે’ કહેવતનો ધ્વન્યાર્થ સંભળાય છે તો ત્રીજો શેર મનોજ ખંડેરિયાની યાદ અપાવે:

જે શોધવામાં જિંદગી આખી પસાર થાય,
ને એ જ હોય પગની તળે, એમ પણ બને.

(કાફિયા બાબતે સહેજ કાચું કપાયું છે. પહેલો કાફિયો –‘થયા’- માં લઘુત્તમ સામાન્ય અવયવ ‘યા’ છે, અને એની પૂર્વે સમસ્વરીય વ્યંજન ‘અ’ હોવાથી કાફિયાનો આધાર ‘અયા’ થાય, ‘થયા’ સાથે ‘ગયા’-‘કયા’ વગેરે કાફિયા જ આવી શકે, ‘મળ્યાં’, ‘ફર્યાં’ વિ. નહીં. મત્લામાં પણ જોડાક્ષર વાપરવામાં આવ્યો હોત તો સોનાની થાળીમાં લોઢાની મેખ ન લાગત)

Comments (11)

હો જી – અઝીઝ ટંકારવી

ક્યાં આરો ઓવારો હો જી
ઉતારશું ક્યાં ભારો હો જી

થોડી ઠોકર થોડાં ફૂલો
સપનાનો અણસારો હો જી

પહોંચી જાશો સામે પાળે
સ્હેજ તમે જો ધારો હો જી

આમ સાચવીને શું કરશું?
જળ જેવો જન્મારો હો જી

એ કેડીથી ગુમ થવાનું
વારા ફરતી વારો હો જી

-અઝીઝ ટંકારવી

અઝીઝ ટંકારવીની આ ગઝલ પહેલી નજરના પ્રેમ જેવી અનુભૂતિ છે. સાવ સરળ શબ્દો અને સુંદર ઉપલબ્ધિ. આમ તો બધા જ શેર સુંદર છે પણ જાતને સાચવીને બેસી રહેવાને બદલે વહેતા રહેવાનો અણસાર આપતો ‘આમ સાચવીને શું કરશું? જળ જેવો જન્મારો હો જી ‘ વાળી વાત મને ખૂબ સ્પર્શી ગઈ.

Comments (6)