દિનકર પથિક શ્રેણીમાંના બધા પોસ્ટ (કક્કાવાર), સંપૂર્ણ પોસ્ટ માટે ક્લીક કરો.
July 24, 2009 at 12:47 AM by વિવેક · Filed under ગઝલ, દિનકર પથિક
હોય છે ભારોભાર મારામાં,
એક તારો વિચાર મારામાં.
આમ રહીને અજાણ મારાથી,
કોણ મારે લટાર મારામાં ?
પ્રેમ શું છે ? નદીને પૂછ્યું તો
ખળભળી એ ધરાર મારામાં.
મોત ને જીંદગીની વચ્ચેનો ,
જીવવાનો પ્રકાર મારામાં
રોજ જન્મે ને રોજ દફનાવું,
આશ તારી મઝાર મારામાં
દોસ્ત બે અક્ષરો મળ્યા અમને,
થઇ ગઝલ ની બજાર મારામાં.
દિનકર પથિક
(ટાઇપ સૌજન્ય: ડૉ. કલ્પન પટેલ, સુરત)
Permalink
November 1, 2007 at 2:20 AM by વિવેક · Filed under ગઝલ, દિનકર પથિક
એક પંખી જેમ હળવો થઈ ગયો
આંખ સામે ક્ષણનો માળો થઈ ગયો
જી હજૂરી કેટલી મોંઘી પડી
જાત સાથે કેવો ઝઘડો થઈ ગયો
ચંદ્ર દેખાતો થયેલો બાદમા
તારા મુખ પર પહેલાં પડદો થઈ ગયો
હાંકવા માંડી મેં નૌકા રણ મહીં
ઝાંઝવાઓને ધ્રુજારો થઈ ગયો
મેં અરીસાને પૂછ્યું, “શા કારણે
બિંબ છોડી, કાચ ઠાલો થઈ ગયો?”
મેં ગઝલ પૂરી કરી બસ તે ક્ષણે
હું મટી મારો, બધાનો થઈ ગયો
– દિનકર પથિક
Permalink