તું ન ચાહે તો પછી એને કોઈ ચાહે નહીં,
જિન્દગીને એ રીતે અળખામણી કરશું અમે.
– બરકત વિરાણી ‘બેફામ’

ગીતો વસંતનાં – ચંદ્રેશ ઠાકોર

ઘંટ નથી શંખ નથી ગૂંજે છે સૂર આ તો ફાગના
ઘેલી હું તો સાંભળું છું હળુહળુ પગલાં વસંતનાં.

આયખાની બપ્પોરે ક્યાં મને પડી’તી
કે લીલાં પણ થઈ જશે પીળાં
અને રાચું છું આજે હું પાનખરી મેળામાં
જોઈ જોઈ ડોકિયાં વસંતનાં
આંજી એનો જાદુ મારી આંખમાં
મારે ગાવાં છે ગીતો વસંતનાં …

ઉજ્જડ બેઠી બધી ડાળીઓ ઉદાસી
ને સોરાતાં વનરાજી નીર
ફેંકે એક કંકર જોને ટીખળી વસંત
પાંખે લીલાં સ્પંદનનાં ચીર
ઘોળી ચૈતન્ય આ નખરાળા ઠાઠમાં
મારે ગાવાં છે ગીતો વસંતનાં …

નીંદરેથી જાગી ઊઠી શરણઈઓ લીલી
ને માલણના છાબ જાણે ખૂટ્યા
મહિયરને માણવા દીકરી આવી
એવાં આંગણનાં ચ્હેરા છે મલક્યા
મોજીલી હું તો લઈ લીલાં ઓવારણાં
મારે ગાવાં છે ગીતો વસંતનાં …

– ચંદ્રેશ ઠાકોર

વસંતને વધાવતું પ્રસન્ન ગીત.

3 Comments »

  1. pragnaju said,

    June 21, 2012 @ 11:15 AM

    લયબધ્ધ મધુરા ગીતની શરુઆત
    ઘંટ નથી શંખ નથી ગૂંજે છે સૂર આ તો ફાગના
    ઘેલી હું તો સાંભળું છું હળુહળુ પગલાં વસંતનાં.
    વાહ્
    યાદ
    કોઈ કન્હાઈની આંખોમાં તરતાં આકાશો
    ઈ આકાશોને કહો કે ઊતરે હળુહળુ કોઈ બોરસલીની ડાળે
    ઈ બોરસલીની ડાળ હવે તો વસંતનું ઝુમ્મર થૈ ઝૂલે
    ઈ ઝુમ્મર નીચે રીસે ઊભી રાધાને ફૂટ્યું ગીત મને કોઈ લાવી આપો.
    મારી દંતકથાનો ચાંદ મને કોઈ લાવી આપો.

  2. P Shah said,

    June 22, 2012 @ 12:32 AM

    સુંદર ઉપાડથી શરૂ થતું એક રુમઝુમતું ગીત !
    માણવાની મઝા આવી.

  3. વિવેક said,

    June 23, 2012 @ 1:41 AM

    સરસ ગીત…

RSS feed for comments on this post · TrackBack URI

Leave a Comment