આરસીમાં – શેખાદમ આબુવાલા
આરસીમાં ડાબું જમણું હોય છે
ભૂમિતિનું એ ઉઠમણું હોય છે
જિંદગીમાં જે નથી પૂરું થતું
એ જ સમણું ખૂબ નમણું હોય છે
દિનની ઈચ્છાઓનું ભારણ રાતમાં
કોણ જાણે કેમ બમણું હોય છે
જે ફરે છે દિવસે થૈને અનાથ
રાત્રે જન્મેલું એ સમણું હોય છે
– શેખાદમ આબુવાલા
વૈશાલી said,
April 18, 2006 @ 2:09 AM
અરીસામાં ડાબું એ જમણું દેખાય અને જમણું એ ડાબું દેખાય એ રોજબરોજની અતિસામાન્ય લાગતી વાતને ભૂમિતિ સાથે સાંકળી કાવ્યમાં ચમત્કૃતિ ક્યાં તો શેખાદમ સર્જી શકે ક્યાં રમેશ પારેખ.
મને વિવેકનો એક શેર યાદ આવે છે:
“પચાવીને જીવનનો મર્મ બેઠો છે એ એથીસ્તો
બધુ દેખાય એને ઊલ્ટું, જુએ જે અરીસાને.”
-વૈશાલી