કેટલા વરસો – કુતુબ ‘આઝાદ’
નશીલી છે નજર તો પણ નજર એ કેટલા વરસો,
છે પોલાદી જિગર તો પણ જિગર એ કેટલા વરસો.
અમારું ઘર ગણી જે ઘર મહીં વસવાટ કીધો છે,
નહિ ખંડેર જેવું થાય ઘર એ કેટલા વરસો.
જીવનની પાત્રતાનો મિત્ર! તે શો અર્થ કર્યો છે,
સફર લાંબી કે ટૂંકી પણ સફર એ કેટલા વરસો.
રટે છે નામ ઈશ્વરનું કરે છે પાઠ ગીતાના,
રહે છે કિંતુ જીવનમાં અસર એ કેટલા વરસો.
મરણ શૈયા ઉપર જ્યારે હતા ત્યારે જ સમજાયું,
ખબર નહોતી રહ્યા તો બેખબર એ કેટલા વરસો.
કબર ‘આઝાદ’ આરસથી કે સોનાથી મઢાવો પણ,
ટકી રહેશે આ દુનિયામાં કબર એ કેટલા વરસો.
-કુતુબ ‘આઝાદ’
વિન્ટેજ વાઇન !
જગદીશ કરંગીયા ‘સમય’ said,
January 26, 2018 @ 5:06 AM
અતિ સુંદર ..
Jagdish Karangiya ‘Samay’
https://jagdishkarangiya.wordpress.com
સુરેશ જાની said,
January 26, 2018 @ 7:14 AM
કુદરતનો એક જ અફર અને સનાતન નિયમ છે –
બધું, બધે, સદા બદલાતું જ રહે છે. જેને આપણે આપણી જાત માનતા આવ્યા છીએ, તે શરીર અને મન પણ હર ક્ષણ બદલાયા કરે છે.
ketan yajnik said,
January 26, 2018 @ 8:10 AM
સરસ્
Rekha Sindhal said,
January 26, 2018 @ 11:57 AM
Poams like this here are food for soul ! Thank you for taking time to share !