ટહુકો તું દોર – રવીન્દ્ર પારેખ
અલ્યા, કાગળ પર ચીતરે છે મોર?
મોરને તો નાનકડું છોકરું યે ચીતરે
હો હિંમત તો ટહુકો તું દોર…
મારામાં રાખી અકબંધ મને ચોરે
તું એવો તે કેવો ઘરફોડું?
છતરીની જેમ મને ઓઢી લે આખી
ને પલળે છે તોય થોડું થોડું
પાણીથી ઠીક, જરા પલળી બતાવ મને
હોય જ્યારે કોરુંધાકોર…
મેલું આકાશ ખૂલે જડબાંની જેમ
જાણે ખાતું બગાસું કોઇ લાંબુ
વાદળાય આમ તો છે કાંઇ નથી બીજું
છે ઠળિયા વિનાના બે’ક જાંબુ
વાદળા કે જાંબુ તો ઢગલો તું ચોરે
જરા આખું આકાશ હવે ચોર…
– રવીન્દ્ર પારેખ
Pravin Shah said,
September 4, 2017 @ 5:20 AM
વાહ ! વાહ !
એકૅ એક કડી પર કુરબાન !
Jayshree Bhakta said,
September 14, 2017 @ 12:52 PM
ચોથી સપ્ટેમ્બરે ટહુકો ગીત? મઝા આવી ગઇ તીર્થેશભાઇ!